𑌨𑍃𑌸𑌿𑌂𑌹𑌾𑌷𑍍𑌟𑌕𑌮𑍍

Mon, 22 Feb, 2021•ambarish•religion

𑌸𑍁𑌨𑍍𑌦𑌰𑌜𑌾𑌮𑌾𑌤𑍃𑌮𑍁𑌨𑍇𑌃 𑌪𑍍𑌰𑌪𑌦𑍍𑌯𑍇 𑌚𑌰𑌣𑌾𑌮𑍍𑌬𑍁𑌜𑌮𑍍 ।
𑌸𑌂𑌸𑌾𑌰𑌾𑌰𑍍𑌣𑌵𑌸𑌮𑍍𑌮𑌗𑍍𑌨𑌜𑌨𑍍𑌤𑍁𑌸𑌨𑍍𑌤𑌾𑌰𑌪𑍋𑌤𑌕𑌮𑍍 ॥

𑌨𑍃𑌸𑌿𑌂𑌹𑌾𑌷𑍍𑌟𑌕𑌸𑍍𑌯 𑌪𑍍𑌰𑌣𑍇𑌤𑍁𑌰𑍍𑌮𑌹𑌤𑍍𑌤𑍍𑌵𑌂 𑌮𑍁𑌦𑌾 𑌭𑌾𑌵𑌯𑌂𑌶𑍍𑌚𑌾𑌰𑍁𑌜𑌾𑌮𑌾𑌤𑍃𑌸𑍂𑌰𑍇𑌃 ।
𑌪𑍍𑌰𑌮𑌾𑌤𑌾𑌮𑌹𑍀𑌂 𑌰𑌾𑌜𑌲𑌕𑍍𑌷𑍍𑌮𑍀𑌂 𑌪𑍍𑌰𑌵𑌕𑍍𑌤𑍍𑌰𑍀𑌂 𑌸𑌦𑌾 𑌧𑌾𑌰𑌯𑌨𑍍𑌪𑍍𑌰𑌾𑌰𑌭𑍇 𑌭𑌾𑌷𑍍𑌯𑌯𑌤𑍍𑌨𑌮𑍍 ॥

𑌇𑌨𑍍𑌦𑍁𑌵𑌦𑌨𑌾𑌵𑍃𑌤𑍍𑌤𑍇𑌨 𑌨𑌿𑌬𑌦𑍍𑌧𑌮𑍍 । 𑌇𑌨𑍍𑌦𑍁𑌵𑌦𑌨𑌾 𑌭𑌜𑌸𑌨𑍈𑌃 𑌸𑌗𑍁𑌰𑍁𑌯𑍁𑌗𑍍𑌮𑍈𑌃 । 𑌅𑌷𑍍𑌟𑍌 𑌅𑌰𑍍𑌥𑌶𑍍𑌲𑍋𑌕𑌾𑌃 𑌨𑌵𑌮𑌃 𑌶𑍍𑌲𑍋𑌕𑌃 𑌫𑌲𑌶𑍍𑌰𑍁𑌤𑍍𑌯𑍈 ।

𑌶𑍍𑌰𑍀𑌮𑌦𑌕𑌲𑌙𑍍𑌕 𑌪𑌰𑌿𑌪𑍂𑌰𑍍𑌣𑌶𑌶𑌿𑌕𑍋𑌟𑍇 𑌶𑍍𑌰𑍀𑌧𑌰 𑌮𑌨𑍋𑌹𑌰 𑌸𑌟𑌾𑌪𑌟𑌲 𑌕𑌾𑌨𑍍𑌤 ।
𑌪𑌾𑌲𑌯 𑌕𑍃𑌪𑌾𑌲𑌯 𑌭𑌵𑌾𑌮𑍍𑌬𑍁𑌧𑌿𑌨𑌿𑌮𑌗𑍍𑌨𑌂 𑌦𑍈𑌤𑍍𑌯𑌵𑌰𑌕𑌾𑌲 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹 ॥ ௧ ॥

𑌶𑍍𑌰𑍀𑌮𑌦𑌕𑌲𑌙𑍍𑌕 𑌶𑍍𑌰𑍀𑌮𑌾𑌨𑍍 𑌮𑌙𑍍𑌗𑌲𑌵𑌾𑌨𑍍 𑌲𑌕𑍍𑌷𑍍𑌮𑍀𑌨𑌿𑌵𑌾𑌸𑍋 𑌵𑌾 । 𑌅𑌕𑌲𑌙𑍍𑌕𑌃 𑌅𑌵𑌿𑌦𑍍𑌯𑌮𑌾𑌨𑌃 𑌕𑌲𑌙𑍍𑌕𑌃 𑌦𑍋𑌷𑌃 𑌯𑌸𑍍𑌯 𑌸𑌃 𑌪𑌰𑌮𑌾𑌤𑍍𑌮𑌾 । 𑌶𑍍𑌰𑍀𑌮𑌾𑌨𑍍 𑌚𑌾𑌸𑍌 𑌅𑌕𑌲𑌙𑍍𑌕𑌶𑍍𑌚 𑌶𑍍𑌰𑍀𑌮𑌦𑌕𑌲𑌙𑍍𑌕 । 𑌪𑌰𑌿𑌪𑍂𑌰𑍍𑌣𑌶𑌶𑌿𑌕𑍋𑌟𑍇 𑌪𑌰𑌿𑌪𑍂𑌰𑍍𑌣𑌃 𑌸𑌮𑍍𑌪𑍂𑌰𑍍𑌣𑌶𑍍𑌚𑌾𑌸𑍌 𑌶𑌶𑍀 𑌶𑌶𑍋𑌸𑍍𑌯𑌾𑌸𑍍𑌤𑍀𑌤𑌿 𑌚𑌨𑍍𑌦𑍍𑌰𑌶𑍍𑌚 𑌪𑌰𑌿𑌪𑍂𑌰𑍍𑌣𑌶𑌶𑍀 𑌪𑍂𑌰𑍍𑌣𑌚𑌨𑍍𑌦𑍍𑌰𑌃 । 𑌤𑍇𑌷𑌾𑌂 𑌪𑌰𑌿𑌪𑍂𑌰𑍍𑌣𑌶𑌶𑌿𑌨𑌾𑌂 𑌕𑍋𑌟𑌿𑌃 𑌇𑌵 𑌸𑍌𑌨𑍍𑌦𑌰𑍍𑌯𑍇𑌣 𑌶𑍌𑌕𑍍𑌲𑍍𑌯𑍇𑌨 𑌨𑌿𑌷𑍍𑌕𑌲𑌙𑍍𑌕𑌤𑌯𑌾 𑌚 𑌪𑌰𑌿𑌪𑍂𑌰𑍍𑌣𑌶𑌶𑌿𑌕𑍋𑌟𑌿𑌃 𑌸𑌮𑍍𑌬𑍁𑌦𑍍𑌧𑍌 । 𑌶𑍍𑌰𑍀𑌧𑌰 𑌧𑌰𑌤𑍀𑌤𑌿 𑌧𑌰𑌃 𑌶𑍍𑌰𑌿𑌯𑍋 𑌧𑌰𑌃 𑌶𑍍𑌰𑍀𑌧𑌰𑌃 𑌲𑌕𑍍𑌷𑍍𑌮𑍀𑌭𑍃𑌤𑍍 𑌮𑌹𑌾𑌵𑌿𑌷𑍍𑌣𑍁𑌃 𑌸𑌮𑍍𑌬𑍁𑌦𑍍𑌧𑍌 । 𑌮𑌨𑍋𑌹𑌰 𑌹𑌰𑌤𑍀𑌤𑌿 𑌹𑌰𑌃 𑌮𑌨𑌸𑍋 𑌹𑌰𑌃 𑌮𑌨𑍋𑌹𑌰𑌃 𑌸𑍁𑌨𑍍𑌦𑌰𑌃 𑌸𑌮𑍍𑌬𑍁𑌦𑍍𑌧𑍌 । 𑌸𑌟𑌾𑌪𑌟𑌲 𑌸𑌟𑌾 𑌕𑍇𑌸𑌰𑌃 𑌏𑌵 𑌪𑌟𑌲𑌂 𑌛𑌦𑌿𑌃 𑌯𑌸𑍍𑌯 𑌸𑌃 𑌸𑌟𑌾𑌪𑌟𑌲𑌃 𑌸𑌮𑍍𑌬𑍁𑌦𑍍𑌧𑍌 । 𑌕𑌾𑌨𑍍𑌤𑌃 𑌶𑍋𑌭𑌨𑌃 𑌕𑌾𑌮𑍍𑌯𑌤𑍇 𑌇𑌤𑌿 𑌕𑌰𑍍𑌮𑌣𑌿 𑌕𑍍𑌤𑌃 𑌸𑌮𑍍𑌬𑍁𑌦𑍍𑌧𑍌 । 𑌪𑌾𑌲𑌯 𑌤𑍍𑌰𑌾𑌹𑌿 । 𑌕𑍃𑌪𑌾𑌲𑌯 𑌕𑍃𑌪𑌾𑌯𑌾𑌃 𑌦𑌯𑌾𑌯𑌾𑌃 𑌆𑌲𑌯𑌃 𑌗𑍃𑌹𑌂 𑌕𑍃𑌪𑌾𑌲𑌯𑌃 𑌸𑌮𑍍𑌬𑍁𑌦𑍍𑌧𑍌 । 𑌭𑌵𑌾𑌮𑍍𑌬𑍁𑌧𑌿𑌨𑌿𑌮𑌗𑍍𑌨𑌂 𑌭𑌵𑌃 𑌸𑌂𑌸𑌾𑌰𑌃 𑌏𑌵 𑌅𑌮𑍍𑌬𑍁𑌧𑌿𑌃 𑌸𑌾𑌗𑌰𑌃 𑌭𑌵𑌾𑌮𑍍𑌬𑍁𑌧𑌿𑌃 । 𑌭𑌵𑌾𑌮𑍍𑌬𑍁𑌧𑍌 𑌨𑌿𑌮𑌗𑍍𑌨𑌃 𑌅𑌨𑍍𑌤𑌃𑌪𑍍𑌰𑌵𑌿𑌷𑍍𑌟𑌃 𑌭𑌵𑌾𑌮𑍍𑌬𑍁𑌧𑌿𑌨𑌿𑌮𑌗𑍍𑌨𑌃 𑌤𑌮𑍍 । 𑌆𑌤𑍍𑌮𑌾𑌨𑌾𑌮𑌿𑌤𑌿 𑌆𑌤𑍍𑌮𑌨𑌃 𑌪𑍁𑌨𑌃𑌪𑍁𑌨𑌃 𑌜𑌨𑌨𑌮𑌰𑌣𑌚𑌕𑍍𑌰𑍇 𑌵𑌰𑍍𑌤𑌮𑌾𑌨𑌤𑍍𑌵𑌾𑌤𑍍 𑌤𑌸𑍍𑌯 𑌤𑌰𑌣𑌮𑍍 𑌅𑌜𑌾𑌨𑌾𑌨𑌸𑍍𑌯 𑌕𑌸𑍍𑌯𑌚𑌨 𑌗𑌭𑍀𑌰𑌸𑌾𑌗𑌰𑌮𑌧𑍍𑌯𑌭𑌾𑌗𑌪𑍍𑌰𑌵𑌿𑌷𑍍𑌟𑌸𑍍𑌯 𑌸𑍍𑌥𑌿𑌤𑍍𑌯𑌾 𑌸𑌾𑌮𑍍𑌯𑌤𑍍𑌵𑌾𑌤𑍍 । 𑌦𑍈𑌤𑍍𑌯𑌵𑌰𑌕𑌾𑌲 𑌦𑍈𑌤𑍍𑌯𑌃 𑌅𑌸𑍁𑌰𑌃 𑌦𑌿𑌤𑍇𑌰𑌪𑌤𑍍𑌯𑌂 𑌪𑍁𑌮𑌾𑌨𑍍 𑌦𑌿𑌤𑍍𑌯𑌦𑌿𑌤𑍍𑌯𑌾𑌦𑌿𑌤𑍍𑌯𑌪𑌤𑍍𑌯𑍁𑌤𑍍𑌤𑌰𑌪𑌦𑌾𑌣𑍍𑌣𑍍𑌯𑌃 𑌇𑌤𑍍𑌯𑌸𑍍𑌮𑌾𑌤𑍍 𑌣𑍍𑌯𑍇𑌨 𑌸𑌿𑌦𑍍𑌧𑌮𑍍 । 𑌦𑍈𑌤𑍍𑌯𑌾𑌨𑌾𑌂 𑌵𑌰𑌃 𑌶𑍍𑌰𑍇𑌷𑍍𑌠𑌃 𑌕𑌾𑌲𑌃 𑌯𑌮𑌃 𑌦𑍈𑌤𑍍𑌯𑌵𑌰𑌕𑌾𑌲𑌃 𑌸𑌮𑍍𑌬𑍁𑌦𑍍𑌧𑍌 𑌦𑍈𑌤𑍍𑌯𑌨𑌾𑌶𑌕 𑌇𑌤𑌿 𑌯𑌾𑌵𑌤𑍍 । 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹𑍇𑌤𑌿 𑌦𑍍𑌵𑌿𑌃 𑌸𑌮𑍍𑌬𑍁𑌦𑍍𑌧𑍌 ।

𑌪𑌾𑌦𑌕𑌮𑌲𑌾𑌵𑌨𑌤𑌪𑌾𑌤𑌕𑌿𑌜𑌨𑌾𑌨𑌾𑌂 𑌪𑌾𑌤𑌕𑌦𑌵𑌾𑌨𑌲 𑌪𑌤𑌤𑍍𑌰𑌿𑌵𑌰𑌕𑍇𑌤𑍋 ।
𑌭𑌾𑌵𑌨 𑌪𑌰𑌾𑌯𑌣 𑌭𑌵𑌾𑌰𑍍𑌤𑌿𑌹𑌰𑌯𑌾 𑌮𑌾𑌂 𑌪𑌾𑌹𑌿 𑌕𑍃𑌪𑌯𑍈𑌵 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹 ॥ ௨ ॥

𑌪𑌾𑌦𑍌 𑌅𑌙𑍍𑌘𑍍𑌰𑍀 𑌕𑌲𑌮𑍇 𑌪𑌦𑍍𑌮𑌪𑍁𑌷𑍍𑌪𑍇 𑌇𑌵 𑌪𑌾𑌦𑌕𑌮𑌲𑍇 । 𑌤𑍇 𑌅𑌵𑌨𑌤𑌾𑌃 𑌶𑌰𑌣𑌂 𑌪𑍍𑌰𑌪𑌨𑍍𑌨𑌾𑌃 𑌗𑌤𑍍𑌯𑌰𑍍𑌥𑌕𑌾𑌕𑌰𑍍𑌮𑌕𑍇𑌤𑍍𑌯𑌾𑌦𑌿𑌨𑌾 𑌕𑌰𑍍𑌤𑌰𑌿 𑌕𑍍𑌤𑌃 𑌦𑍍𑌵𑌿𑌤𑍀𑌯𑌾 𑌶𑍍𑌰𑌿𑌤𑌾𑌤𑍀𑌤𑍇𑌤𑍍𑌯𑌾𑌦𑌿𑌨𑌾 𑌚 𑌦𑍍𑌵𑌿𑌤𑍀𑌯𑌾𑌤𑌤𑍍𑌪𑍁𑌰𑍁𑌷𑌃 । 𑌪𑌾𑌤𑌕𑌂 𑌪𑌾𑌤𑌯𑌤𑍀𑌤𑌿 𑌪𑌾𑌪𑌂 𑌤𑌦𑍍𑌵𑌨𑍍𑌤𑌃 𑌪𑌾𑌪𑍍𑌮𑌾𑌨𑌃 𑌪𑌾𑌤𑌕𑌿𑌨 𑌇𑌨𑍍𑌨𑌨𑍍𑌤𑌾𑌤𑍍 । 𑌜𑌨𑌾 𑌦𑍇𑌹𑌿𑌨𑌃 । 𑌪𑌾𑌦𑌕𑌮𑌲𑌾𑌵𑌨𑌤𑌾𑌃 𑌪𑌾𑌤𑌕𑌿𑌨𑍋 𑌜𑌨𑌾𑌃 𑌕𑌰𑍍𑌮𑌧𑌾𑌰𑌯𑍇 𑌤𑍇𑌷𑌾𑌮𑌿𑌤𑌿 𑌯𑌾𑌵𑌤𑍍 । 𑌪𑌾𑌤𑌕𑌮𑍇𑌵 𑌦𑌵𑍋 𑌵𑌨𑌂 𑌪𑌾𑌤𑌕𑌦𑌵𑌃 𑌯𑌦𑍍𑌵𑌾 𑌪𑌾𑌤𑌕𑌮𑌯𑍋 𑌦𑌵𑌃 𑌮𑌧𑍍𑌯𑌮𑌪𑌦𑌲𑍋𑌪𑌾𑌤𑍍 । 𑌤𑌥𑌾𑌭𑍂𑌤𑌸𑍍𑌯 𑌵𑌨𑌸𑍍𑌯 𑌜𑍍𑌵𑌾𑌲𑌕𑍋 𑌵𑌿𑌨𑌾𑌶𑌕𑌃 𑌅𑌨𑌲𑍋𑌗𑍍𑌨𑌿𑌃 𑌪𑌾𑌤𑌕𑌦𑌵𑌾𑌨𑌲𑌃 𑌸𑌮𑍍𑌬𑍁𑌦𑍍𑌧𑍌 । 𑌪𑌾𑌦𑌕𑌮𑌲𑌾𑌵𑌨𑌤𑌪𑌾𑌤𑌕𑌿𑌜𑌨𑌾𑌨𑌾𑌂 𑌪𑌾𑌤𑌕𑌦𑌵𑌾𑌨𑌲𑍇𑌤𑍍𑌯𑌨𑍍𑌵𑌯𑌃 । 𑌪𑌤𑌤𑍍𑌰𑌿𑌃 𑌪𑌕𑍍𑌷𑍀 𑌪𑌤𑌤𑌿 𑌡𑌯𑌤 𑌇𑌤𑌿 । 𑌪𑌤𑌤𑍍𑌰𑌿𑌰𑍍𑌵𑌰𑌶𑍍𑌚 𑌪𑌤𑌤𑍍𑌰𑌿𑌵𑌰𑍋 𑌗𑌰𑍁𑌡𑌃 । 𑌨 𑌨𑌿𑌰𑍍𑌧𑌾𑌰𑌣 𑌇𑌤𑌿 𑌕𑌰𑍍𑌮𑌧𑌾𑌰𑌯𑌦𑍍𑌵𑌾𑌰𑌾 𑌸𑌿𑌦𑍍𑌧𑌿𑌰𑌿𑌷𑍍𑌟𑌾 । 𑌪𑌤𑌤𑍍𑌰𑌿𑌵𑌰𑌃 𑌕𑍇𑌤𑍌 𑌧𑍍𑌵𑌜𑍇 𑌯𑌸𑍍𑌯 𑌸 𑌪𑌤𑌤𑍍𑌰𑌿𑌵𑌰𑌕𑍇𑌤𑍁𑌃 𑌶𑍍𑌰𑍀𑌮𑌨𑍍𑌨𑌰𑌾𑌯𑌣𑌃 𑌸𑌮𑍍𑌬𑍁𑌦𑍍𑌧𑍌 । 𑌭𑌾𑌵𑌨𑌃 𑌭𑌾𑌵𑌯𑌤𑌿 𑌦𑍃𑌜𑌤𑌿 𑌭𑍁𑌵𑌨𑌮𑌿𑌤𑌿 𑌜𑌗𑌤𑍍𑌸𑍍𑌰𑌷𑍍𑌟𑌾 𑌸𑌮𑍍𑌬𑍁𑌦𑍍𑌧𑍌 । 𑌪𑌰𑌾𑌯𑌣𑌃 𑌪𑌰𑌂 𑌕𑍇𑌵𑌲𑌮𑍍 𑌅𑌯𑌨𑌮𑌾𑌸𑌕𑍍𑌤𑌿𑌸𑍍𑌥𑌾𑌨𑌮𑌿𑌤𑌿 𑌪𑌰𑌾𑌯𑌣 𑌆𑌶𑍍𑌰𑌯𑌃 𑌸𑌮𑍍𑌬𑍁𑌦𑍍𑌧𑍌 । 𑌭𑌵𑌾𑌰𑍍𑌤𑌿𑌹𑌰𑌯𑌾 𑌭𑌵𑌸𑍍𑌯 𑌸𑌂𑌸𑌾𑌰𑌸𑍍𑌯 𑌆𑌰𑍍𑌤𑍀 𑌰𑍋𑌗𑍋 𑌭𑌵𑌾𑌰𑍍𑌤𑌿𑌃 । 𑌤𑌸𑍍𑌯 𑌹𑌰𑌤𑍀𑌤𑌿 𑌹𑌰𑌾 𑌭𑌵𑌾𑌰𑍍𑌤𑌿𑌹𑌰𑌾 𑌤𑌯𑌾 𑌕𑍃𑌪𑌯𑍇𑌤𑍍𑌯𑌨𑍍𑌵𑌯𑌃 । 𑌮𑌾𑌂 𑌶𑍍𑌰𑍀𑌮𑍁𑌨𑌿𑌮𑍁𑌤 𑌪𑌠𑌿𑌤𑌾𑌰𑌮𑍍 । 𑌪𑌾𑌹𑌿 𑌰𑌕𑍍𑌷 । 𑌕𑍃𑌪𑌯𑌾 𑌘𑍃𑌣𑌯𑌾 । 𑌏𑌵 𑌕𑍃𑌪𑌾 𑌹𑍍𑌯𑍇𑌕𑌾 𑌭𑌵𑌾𑌰𑍍𑌤𑌿𑌹𑌰𑍇𑌤𑌿 𑌭𑌗𑌵𑌤𑌃 𑌶𑍍𑌰𑍀𑌮𑌲𑍍𑌁𑌲𑌕𑍍𑌷𑍍𑌮𑍀𑌨𑌾𑌰𑌾𑌯𑌣𑌸𑍍𑌯 𑌕𑍃𑌪𑌾𑌕𑌟𑌾𑌕𑍍𑌷𑌸𑍍𑌯 𑌸𑌰𑍍𑌵𑌪𑍍𑌰𑌧𑌾𑌨𑌹𑍇𑌤𑍁𑌤𑍍𑌵𑌂 𑌮𑍋𑌕𑍍𑌷𑌪𑍍𑌰𑌦𑌾𑌨𑍇 । 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹𑍇𑌤𑌿 𑌦𑍍𑌵𑌿𑌃 𑌸𑌮𑍍𑌬𑍁𑌦𑍍𑌧𑍌 ।

𑌤𑍁𑌙𑍍𑌗𑌨𑌖𑌪𑌙𑍍𑌕𑍍𑌤𑌿𑌦𑌳𑌿𑌤𑌾𑌸𑍁𑌰𑌵𑌰𑌾𑌸𑍃𑌕𑍍𑌪𑌙𑍍𑌕𑌨𑌵𑌕𑍁𑌙𑍍𑌕𑍁𑌮𑌵𑌿𑌪𑌙𑍍𑌕𑌿𑌲𑌮𑌹𑍋𑌰𑌃 ।
𑌪𑌣𑍍𑌡𑌿𑌤𑌨𑌿𑌧𑌾𑌨 𑌕𑌮𑌲𑌾𑌲𑌯 𑌨𑌮𑌸𑍍𑌤𑍇 𑌪𑌙𑍍𑌕𑌜𑌨𑌿𑌷𑌣𑍍𑌣 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹 ॥ ௩ ॥

𑌤𑍁𑌙𑍍𑌗𑌾 𑌦𑍀𑌰𑍍𑌘𑌾𑌃 𑌨𑌖𑌾𑌃 𑌕𑌰𑌰𑍁𑌹𑌾𑌃 𑌤𑍁𑌙𑍍𑌗𑌨𑌖𑌾𑌃 𑌤𑍇𑌷𑌾𑌂 𑌪𑌙𑍍𑌕𑍍𑌤𑍀 𑌆𑌵𑌲𑍍𑌯𑍌 𑌤𑍁𑌙𑍍𑌗𑌨𑌖𑌪𑌙𑍍𑌕𑍍𑌤𑍀 𑌤𑌾𑌭𑍍𑌯𑌾𑌂 𑌦𑌳𑌿𑌤𑌃 𑌖𑌣𑍍𑌡𑌿𑌤𑌃 𑌦𑌳𑌁 𑌵𑌿𑌶𑌰𑌣𑍇 𑌵𑌿𑌦𑌾𑌰𑌣𑍇 𑌚𑍇𑌤𑍍𑌯𑌸𑍍𑌮𑌾𑌤𑍍 𑌕𑌰𑍍𑌮𑌣𑌿 𑌕𑍍𑌤𑍇𑌨 𑌤𑍁𑌙𑍍𑌗𑌨𑌖𑌪𑌙𑍍𑌕𑍍𑌤𑌿𑌦𑌳𑌿𑌤𑌃 । 𑌤𑌾𑌦𑍃𑌶𑌃 𑌅𑌸𑍁𑌰𑍋 𑌦𑍈𑌤𑍍𑌯𑌃 𑌨𑌾𑌸𑍍𑌤𑌿 𑌸𑍁𑌰𑌾 𑌯𑍇𑌷𑌾𑌂 𑌤𑍇𑌸𑍁𑌰𑌾𑌃 । 𑌤𑌥𑌾𑌭𑍂𑌤𑌃 𑌹𑌿𑌰𑌣𑍍𑌯𑌕𑌶𑌿𑌪𑍁𑌨𑌾𑌮𑌾 𑌤𑍁𑌙𑍍𑌗𑌨𑌖𑌪𑌙𑍍𑌕𑍍𑌤𑌿𑌦𑌳𑌿𑌤𑌾𑌸𑍁𑌰𑌃 । 𑌵𑌰𑌂 𑌕𑍁𑌙𑍍𑌕𑍁𑌮𑌵𑌰𑍍𑌣𑌃 𑌕𑌾𑌶𑍍𑌮𑍀𑌰𑌜𑌨𑍍𑌮𑌾𑌗𑍍𑌨𑌿𑌶𑌿𑌖𑌂 𑌵𑌰𑌂 𑌵𑌾𑌹𑍍𑌲𑍀𑌕𑌪𑍀𑌤𑌨𑍇 𑌰𑌕𑍍𑌤𑌸𑌙𑍍𑌕𑍋𑌚𑌪𑌿𑌶𑍁𑌨𑌮𑍍 𑌇𑌤𑍍𑌯𑌮𑌰𑌾𑌤𑍍 । 𑌅𑌸𑍃𑌗𑍍𑌰𑌕𑍍𑌤𑌂 𑌨 𑌸𑍃𑌜𑌤𑍀𑌤𑌿 । 𑌵𑌰𑌂 𑌚𑌾𑌦𑍋 𑌅𑌸𑍃𑌕𑍍𑌚 𑌵𑌰𑌾𑌸𑍃𑌕𑍍 । 𑌤𑌦𑍇𑌵 𑌪𑌙𑍍𑌕𑌃 𑌕𑌰𑍍𑌦𑌮 𑌇𑌵 𑌵𑌰𑌾𑌸𑍃𑌕𑍍𑌪𑌙𑍍𑌕𑌃 । 𑌤𑍁𑌙𑍍𑌗𑌨𑌖𑌪𑌙𑍍𑌕𑍍𑌤𑌿𑌦𑌳𑌿𑌤𑌾𑌸𑍁𑌰𑌸𑍍𑌯 𑌵𑌰𑌾𑌸𑍃𑌕𑍍𑌪𑌙𑍍𑌕𑌃 । 𑌸 𑌪𑍍𑌙𑍍𑌕 𑌏𑌵 𑌨𑌵𑌕𑍁𑌙𑍍𑌕𑍁𑌮𑌮𑌿𑌵 𑌨𑌵𑌂 𑌨𑍂𑌤𑌨𑌂 𑌕𑍁𑌙𑍍𑌕𑍁𑌮𑌂 𑌗𑌨𑍍𑌧𑌦𑍍𑌰𑌵𑍍𑌯𑌵𑌿𑌶𑍇𑌷𑌃 𑌤𑍁𑌙𑍍𑌗𑌨𑌖𑌪𑌙𑍍𑌕𑍍𑌤𑌿𑌦𑌳𑌿𑌤𑌾𑌸𑍁𑌰𑌵𑌰𑌾𑌸𑍃𑌕𑍍𑌪𑌙𑍍𑌕𑌨𑌵𑌕𑍁𑌙𑍍𑌕𑍁𑌮𑌂 𑌵𑌰𑍍𑌣𑌸𑌾𑌮𑍍𑌯𑌾𑌲𑍍𑌲𑍇𑌪𑌸𑌾𑌦𑍃𑌶𑍍𑌯𑌾𑌚𑍍𑌚 । 𑌤𑍇𑌨 𑌵𑌿𑌪𑌙𑍍𑌕𑌿𑌲𑌂 𑌸𑌪𑌙𑍍𑌕𑌂 𑌤𑍁𑌙𑍍𑌗𑌨𑌖𑌪𑌙𑍍𑌕𑍍𑌤𑌿𑌦𑌳𑌿𑌤𑌾𑌸𑍁𑌰𑌵𑌰𑌾𑌸𑍃𑌕𑍍𑌪𑌙𑍍𑌕𑌨𑌵𑌕𑍁𑌙𑍍𑌕𑍁𑌮𑌵𑌿𑌪𑌙𑍍𑌕𑌿𑌲𑌮𑍍 । 𑌮𑌹𑌦𑍍𑌬𑍃𑌹𑌤𑍍 𑌉𑌰𑌃 𑌵𑌕𑍍𑌷𑌃𑌸𑍍𑌥𑌲𑌂 𑌮𑌹𑍋𑌰𑌃 𑌕𑌰𑍍𑌮𑌧𑌾𑌰𑌯𑌾𑌤𑍍 । 𑌤𑍁𑌙𑍍𑌗𑌨𑌖𑌪𑌙𑍍𑌕𑍍𑌤𑌿𑌦𑌳𑌿𑌤𑌾𑌸𑍁𑌰𑌵𑌰𑌾𑌸𑍃𑌕𑍍𑌪𑌙𑍍𑌕𑌨𑌵𑌕𑍁𑌙𑍍𑌕𑍁𑌮𑌵𑌿𑌪𑌙𑍍𑌕𑌿𑌲𑌂 𑌮𑌹𑍋𑌰𑍋 𑌯𑌸𑍍𑌯 𑌸𑌃 𑌨𑌖𑍈𑌃 𑌹𑌿𑌰𑌣𑍍𑌯𑌕𑌶𑌿𑌪𑍋𑌃 𑌕𑍋𑌷𑍍𑌠𑌾𑌦𑍀𑌨𑍍𑌮𑌰𑍍𑌮𑌭𑌾𑌗𑌾𑌨𑍍𑌵𑌿𑌦𑍀𑌰𑍍𑌯 𑌘𑌾𑌤𑌮𑍃𑌗𑌃 𑌸𑌿𑌂𑌹 𑌇𑌵𑌾𑌲𑌿𑌪𑍍𑌤𑌰𑍁𑌧𑌿𑌰𑌃 𑌕𑌿𑌞𑍍𑌚 𑌆𑌸𑍀𑌨𑌘𑌾𑌤𑌕𑌤𑍍𑌵𑌾𑌦𑍍𑌰𑍁𑌧𑌿𑌰𑌮𑌯𑌵𑌕𑍍𑌷𑌾 𑌇𑌤𑌿 𑌤𑍁𑌙𑍍𑌗𑌨𑌖𑌪𑌙𑍍𑌕𑍍𑌤𑌿𑌦𑌳𑌿𑌤𑌾𑌸𑍁𑌰𑌵𑌰𑌾𑌸𑍃𑌕𑍍𑌪𑌙𑍍𑌕𑌨𑌵𑌕𑍁𑌙𑍍𑌕𑍁𑌮𑌵𑌿𑌪𑌙𑍍𑌕𑌿𑌲𑌮𑌹𑍋𑌰𑌃 𑌸𑌮𑍍𑌬𑍁𑌦𑍍𑌧𑍌 । 𑌅𑌤𑍍𑌵𑌸𑌨𑍍𑌤𑌸𑍍𑌯 𑌚𑌾𑌧𑌾𑌤𑍋𑌰𑌿𑌤𑍍𑌯𑌤𑍍𑌰 𑌅𑌸𑌮𑍍𑌬𑍁𑌦𑍍𑌧𑌾𑌵𑌿𑌤𑍍𑌯𑌨𑍁𑌵𑍃𑌤𑍍𑌤𑍍𑌯𑌾 𑌸𑌕𑌾𑌰𑌾𑌨𑍍𑌤𑌸𑍍𑌯𑍋𑌪𑌧𑌾𑌦𑍀𑌰𑍍𑌘𑌨𑌿𑌷𑍇𑌧𑌾𑌤𑍍 𑌮𑌹𑍋𑌰 𑌇𑌤𑍍𑌯𑍇𑌵 । 𑌪𑌣𑍍𑌡𑌿𑌤𑌾𑌨𑌾𑌂 𑌵𑌿𑌪𑌶𑍍𑌚𑌿𑌤𑌾𑌨𑌾𑌂 𑌨𑌿𑌧𑌾𑌨𑌂 𑌨𑌿𑌧𑌿𑌃 𑌸𑌮𑍍𑌬𑍁𑌦𑍍𑌧𑍌 । 𑌕𑌮𑌲𑌾𑌯𑌾𑌃 𑌮𑌹𑌾𑌲𑌕𑍍𑌷𑍍𑌮𑍍𑌯𑌾𑌃 𑌆𑌲𑌯𑍋 𑌵𑌾𑌸𑌸𑍍𑌥𑌾𑌨𑌂 𑌸𑌮𑍍𑌬𑍁𑌦𑍍𑌧𑍌 । 𑌨𑌮𑌃 𑌤𑍇 𑌤𑍁𑌭𑍍𑌯𑌮𑌿𑌤𑌿 𑌸𑌮𑍍𑌬𑍁𑌦𑍍𑌧𑍀𑌰𑌨𑍍𑌵𑌿𑌤𑌂 𑌵𑌾𑌕𑍍𑌯𑌮𑍍 । 𑌪𑌙𑍍𑌕𑌜𑌂 𑌕𑌮𑌲𑌮𑍍 । 𑌨𑌿𑌷𑌣𑍍𑌣𑌃 𑌅𑌧𑍍𑌯𑍁𑌷𑌿𑌤𑌃 𑌷𑌦𑍢𑌁 𑌵𑌿𑌶𑌰𑌣𑌗𑌤𑍍𑌯𑌵𑌸𑌾𑌦𑌨𑍇𑌷𑍍𑌵𑌿𑌤𑍍𑌯𑌸𑍍𑌮𑌾𑌤𑍍 𑌕𑍍𑌤𑍇𑌨 𑌰𑌦𑌾𑌭𑍍𑌯𑌾𑌮𑌿𑌤𑍍𑌯𑌾𑌦𑌿𑌨𑌾 𑌤𑌕𑌾𑌰𑌸𑍍𑌯 𑌨𑌕𑌾𑌰𑌾𑌦𑍇𑌶𑌾𑌤𑍍 𑌣𑌤𑍍𑌵𑍇𑌨 𑌚 𑌸𑌿𑌦𑍍𑌧𑌮𑍍 । 𑌪𑌙𑍍𑌕𑌜𑌂 𑌨𑌿𑌷𑌣𑍍𑌣 𑌇𑌤𑌿 𑌦𑍍𑌵𑌿𑌤𑍀𑌯𑌾 𑌶𑍍𑌰𑌿𑌤𑌾𑌤𑍀𑌤𑍇𑌤𑍍𑌯𑌾𑌦𑌿𑌨𑌾 𑌪𑌙𑌜𑌨𑌿𑌷𑌣𑍍𑌣𑌃 𑌸𑌮𑍍𑌬𑍁𑌦𑍍𑌧𑍌 । 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹𑍇𑌤𑌿 𑌦𑍍𑌵𑌿𑌃 𑌸𑌮𑍍𑌬𑍁𑌦𑍍𑌧𑍌 ।

𑌮𑍌𑌳𑌿𑌷𑍁 𑌵𑌿𑌭𑍂𑌷𑌣𑌮𑌿𑌵𑌾𑌮𑌰𑌵𑌰𑌾𑌣𑌾𑌂 𑌯𑍋𑌗𑌿𑌹𑍃𑌦𑌯𑍇𑌷𑍁 𑌚 𑌶𑌿𑌰𑌃𑌸𑍁 𑌨𑌿𑌗𑌮𑌾𑌨𑌾𑌮𑍍 ।
𑌰𑌾𑌜𑌦𑌰𑌵𑌿𑌨𑍍𑌦𑌰𑍁𑌚𑌿𑌰𑌂 𑌪𑌦𑌯𑍁𑌗𑌂 𑌤𑍇 𑌦𑍇𑌹𑌿 𑌮𑌮 𑌮𑍂𑌰𑍍𑌧𑍍𑌨𑌿 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹 ॥ ௪ ॥

𑌮𑍌𑌳𑌿𑌷𑍁 𑌚𑍂𑌡𑌾𑌸𑍁 𑌵𑌿𑌭𑍂𑌷𑌣𑌂 𑌮𑌣𑍍𑌡𑌨𑌮𑍍 𑌇𑌵 𑌉𑌪𑌮𑌾𑌯𑌾𑌮𑍍 𑌅𑌮𑌰𑌾𑌣𑌾𑌂 𑌸𑍁𑌰𑌾𑌣𑌾𑌮𑍍 । 𑌸𑍁𑌰𑌶𑌿𑌰𑍋𑌲𑌙𑍍𑌕𑌰𑌣𑌭𑍂𑌤𑌮𑌿𑌵 । 𑌤𑌥𑌾 𑌯𑍋𑌗𑌿𑌹𑍃𑌦𑌯𑍇𑌷𑍁 𑌯𑍋𑌗𑌿𑌨𑌾𑌂 𑌯𑌤𑍀𑌨𑌾𑌂 𑌹𑍃𑌦𑌯𑌾𑌨𑌿 𑌮𑌾𑌨𑌸𑌾𑌨𑌿 𑌤𑍇𑌷𑍁 । 𑌤𑌥𑌾 𑌚 𑌶𑌿𑌰𑌃𑌸𑍁 𑌮𑌸𑍍𑌤𑌕𑍇𑌷𑍁 𑌨𑌿𑌗𑌮𑌾𑌨𑌾𑌂 𑌵𑍇𑌦𑌾𑌨𑌾𑌮𑍍 । 𑌰𑌾𑌜𑌤𑍍 𑌦𑍇𑌦𑍀𑌪𑍍𑌯𑌮𑌾𑌨𑌮𑍍 । 𑌅𑌮𑌰𑌾𑌣𑌾𑌂 𑌮𑍌𑌳𑌿𑌷𑍁 𑌯𑍋𑌗𑌿𑌹𑍃𑌦𑌯𑍇𑌷𑍁 𑌨𑌿𑌗𑌮𑌾𑌨𑌾𑌂 𑌚 𑌶𑌿𑌰𑌃𑌸𑍍𑌵𑌿𑌤𑌿 𑌤𑍍𑌰𑌿𑌷𑍍𑌵𑌪𑌿 𑌰𑌾𑌜𑌦𑌿𑌤𑌿 𑌯𑌾𑌵𑌤𑍍 । 𑌅𑌰𑌵𑌿𑌨𑍍𑌦𑌰𑍁𑌚𑌿𑌰𑌮𑍍 𑌅𑌰𑌵𑌿𑌨𑍍𑌦𑌂 𑌕𑌮𑌲𑌮𑌿𑌵 𑌰𑍁𑌚𑌿𑌰𑌂 𑌸𑍁𑌨𑍍𑌦𑌰𑌂 𑌪𑌦𑌯𑍁𑌗𑌮𑍍 𑌅𑌙𑍍𑌘𑍍𑌰𑌿𑌦𑍍𑌵𑌯𑌂 𑌤𑍇 𑌤𑌵 । 𑌰𑌾𑌜𑌦𑌰𑌵𑌿𑌨𑍍𑌦𑌰𑍁𑌚𑌿𑌰𑌂 𑌪𑌦𑌯𑍁𑌗𑌮𑌿𑌤𑌿 𑌦𑍍𑌵𑌿𑌤𑍀𑌯𑌾𑌯𑌾𑌮𑍍 । 𑌤𑌾𑌦𑍃𑌶𑌂 𑌤𑌵 𑌪𑌦𑌯𑍁𑌗𑌂 𑌦𑍇𑌹𑌿 𑌯𑌚𑍍𑌛 𑌮𑌮 𑌆𑌤𑍍𑌮𑌨𑌃 𑌮𑍂𑌰𑍍𑌧𑍍𑌨𑌿 𑌮𑌸𑍍𑌤𑌕𑍇 । 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹𑍇𑌤𑌿 𑌦𑍍𑌵𑌿𑌃 𑌸𑌮𑍍𑌬𑍁𑌦𑍍𑌧𑍌 ।

𑌵𑌾𑌰𑌿𑌜𑌵𑌿𑌲𑍋𑌚𑌨 𑌮𑌦𑌨𑍍𑌤𑌿𑌮𑌦𑌶𑌾𑌯𑌾𑌂 𑌕𑍍𑌲𑍇𑌶𑌵𑌿𑌵𑌶𑍀𑌕𑍃𑌤𑌸𑌮𑌸𑍍𑌤𑌕𑌰𑌣𑌾𑌯𑌾𑌮𑍍 ।
𑌏𑌹𑌿 𑌰𑌮𑌯𑌾 𑌸𑌹 𑌶𑌰𑌣𑍍𑌯 𑌵𑌿𑌹𑌗𑌾𑌨𑌾𑌂 𑌨𑌾𑌥𑌮𑌧𑌿𑌰𑍁𑌹𑍍𑌯 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹 ॥ ௫ ॥

𑌵𑌾𑌰𑌿𑌜𑌵𑌿𑌲𑍋𑌚𑌨 𑌵𑌾𑌰𑌿𑌣𑌿 𑌜𑌾𑌯𑌤 𑌇𑌤𑌿 𑌵𑌾𑌰𑌿𑌜𑌂 𑌕𑌮𑌲𑌪𑍁𑌷𑍍𑌪𑌂 𑌸𑌪𑍍𑌤𑌮𑍍𑌯𑌾𑌂 𑌜𑌨𑍇𑌰𑍍𑌡𑌃 𑌇𑌤𑍍𑌯𑌸𑍍𑌮𑌾𑌤𑍍 । 𑌵𑌿𑌲𑍋𑌚𑍍𑌯𑌤𑍇 𑌦𑍃𑌶𑍍𑌯𑌤𑍇𑌨𑍇𑌨𑍇𑌤𑌿 𑌵𑌿𑌲𑍋𑌚𑌨𑌂 𑌚𑌕𑍍𑌷𑍁𑌃 । 𑌵𑌾𑌰𑌿𑌜𑌾𑌨𑍀𑌵 𑌵𑌿𑌲𑍋𑌚𑌨𑌾𑌨𑌿 𑌸𑍌𑌨𑍍𑌦𑌰𑍍𑌯𑍇𑌣 𑌕𑍋𑌮𑌲𑌤𑍍𑌵𑍇𑌨 𑌰𑍂𑌪𑍇𑌣 𑌚𑍇𑌤𑌿 𑌵𑌾𑌰𑌿𑌜𑌵𑌿𑌲𑍋𑌚𑌨𑌃 𑌲𑌕𑍍𑌷𑍍𑌮𑍀𑌨𑍃𑌸𑌿𑌂𑌹𑌃 𑌸𑌮𑍍𑌬𑍁𑌦𑍍𑌧𑍌 । 𑌮𑌦𑌨𑍍𑌤𑌿𑌮𑌦𑌶𑌾𑌯𑌾𑌮𑍍 𑌅𑌨𑍍𑌤𑌿𑌮𑌾 𑌚𑌰𑌮𑌾 𑌦𑌶𑌾 𑌸𑍍𑌥𑌿𑌤𑌿𑌃 𑌅𑌨𑍍𑌤𑌿𑌮𑌦𑌶𑌾 𑌚𑌰𑌮𑌸𑍍𑌥𑌿𑌤𑌿𑌰𑍍𑌮𑌰𑌣𑌾𑌤𑍍𑌪𑍍𑌰𑌾𑌗𑌿𑌤𑌿 । 𑌮𑌦𑌨𑍍𑌤𑌿𑌮𑌦𑌶𑌾 𑌮𑌮𑌾𑌨𑍍𑌤𑌿𑌮𑌦𑌶𑌾 𑌸𑌪𑍍𑌤𑌮𑍍𑌯𑌾𑌮𑍍 । 𑌪𑍍𑌰𑌤𑍍𑌯𑌯𑍋𑌤𑍍𑌤𑌰𑌪𑌦𑌯𑍋𑌶𑍍𑌚 𑌇𑌤𑌿 𑌅𑌸𑍍𑌮𑌦𑌃 𑌸𑍍𑌥𑌾𑌨𑍇 𑌮𑌦𑌃 𑌆𑌦𑍇𑌶𑌃 । 𑌕𑍍𑌲𑍇𑌶𑌵𑌿𑌵𑌶𑍀𑌕𑍃𑌤𑌸𑌮𑌸𑍍𑌤𑌕𑌰𑌣𑌾𑌯𑌾𑌮𑍍 । 𑌅𑌵𑌿𑌵𑌶𑌾𑌨𑌿 𑌸𑍍𑌵𑌤𑌨𑍍𑌤𑍍𑌰𑌾𑌣𑌿 𑌵𑌿𑌵𑌶𑌾𑌨𑌿 𑌪𑌰𑌤𑌨𑍍𑌤𑍍𑌰𑌾𑌣𑌿 𑌸𑌮𑍍𑌪𑌦𑍍𑌯𑌮𑌾𑌨𑌾𑌨𑌿 𑌕𑍃𑌤𑌾𑌨𑌿 𑌵𑌿𑌹𑌿𑌤𑌾𑌨𑌿 𑌵𑌿𑌵𑌶𑍀𑌕𑍃𑌤𑌾𑌨𑌿 𑌅𑌧𑍀𑌨𑍀𑌕𑍃𑌤𑌾𑌨𑌿 । 𑌅𑌭𑍂𑌤𑌤𑌦𑍍𑌭𑌾𑌵𑍇 𑌕𑍃𑌭𑍍𑌵𑌸𑍍𑌤𑌿𑌯𑍋𑌗𑍇 𑌸𑌮𑍍𑌪𑌦𑍍𑌯𑌕𑌰𑍍𑌤𑌰𑌿 𑌚𑍍𑌵𑌿𑌰𑌿𑌤𑌿 𑌚𑍍𑌵𑍍𑌯𑌨𑍍𑌤𑌸𑍍𑌯 𑌊𑌰𑍍𑌯𑌾𑌦𑌿𑌚𑍍𑌵𑌿𑌡𑌾𑌚𑌶𑍍𑌚𑍇𑌤𑌿 𑌗𑌤𑌿𑌸𑌞𑍍𑌜𑍍𑌞𑌾𑌯𑌾𑌂 𑌗𑌮𑍍𑌯𑌮𑌾𑌨𑌾𑌯𑌾𑌂 𑌕𑍁𑌗𑌤𑌿𑌪𑍍𑌰𑌾𑌦𑌯 𑌇𑌤𑍍𑌯𑌸𑍍𑌮𑌾𑌤𑍍𑌤𑌤𑍍𑌪𑍁𑌰𑍁𑌷𑌸𑌮𑌾𑌸𑍇𑌨 𑌵𑍍𑌯𑍁𑌤𑍍𑌪𑌤𑍍𑌤𑌿𑌃 । 𑌕𑍍𑌲𑍇𑌶𑍈𑌃 𑌦𑍁𑌃𑌖𑍈𑌃 𑌯𑌦𑍍𑌵𑌾 𑌮𑌰𑌣𑌭𑌯𑍈𑌃 । 𑌕𑍍𑌲𑍇𑌶𑍈𑌰𑍍𑌵𑌿𑌵𑌶𑍀𑌕𑍃𑌤𑌾𑌨𑌿 𑌕𑍍𑌲𑍇𑌶𑌵𑌿𑌵𑌶𑍀𑌕𑍃𑌤𑌾𑌨𑌿 𑌤𑍃𑌤𑍀𑌯𑌾𑌤𑌤𑍍𑌪𑍁𑌰𑍁𑌷𑌾𑌤𑍍 । 𑌸𑌮𑌸𑍍𑌤𑌾𑌨𑌿 𑌸𑌰𑍍𑌵𑌾𑌣𑌿 𑌕𑌰𑌣𑌾𑌨𑌿 𑌇𑌨𑍍𑌦𑍍𑌰𑌿𑌯𑌾𑌣𑌿 𑌸𑌮𑌸𑍍𑌤𑌕𑌰𑌣𑌾𑌨𑌿 𑌸𑌰𑍍𑌵𑍇𑌨𑍍𑌦𑍍𑌰𑌿𑌯𑌾𑌣𑌿 । 𑌕𑍍𑌲𑍇𑌶𑌵𑌿𑌵𑌶𑍀𑌕𑍃𑌤𑌾𑌨𑌿 𑌸𑌮𑌸𑍍𑌤𑌕𑌰𑌣𑌾𑌨𑌿 𑌯𑌸𑍍𑌯𑌾𑌂 𑌸𑌾 𑌕𑍍𑌲𑍇𑌶𑌵𑌿𑌵𑌶𑍀𑌕𑍃𑌤𑌸𑌮𑌸𑍍𑌤𑌕𑌰𑌣𑌾 𑌬𑌹𑍁𑌵𑍍𑌰𑍀𑌹𑌿𑌣𑌾 । 𑌸𑌤𑍍𑌯𑌾𑌂 𑌤𑌸𑍍𑌯𑌾𑌂 𑌕𑍍𑌲𑍇𑌶𑌵𑌿𑌵𑌶𑍀𑌕𑍃𑌤𑌸𑌮𑌸𑍍𑌤𑌕𑌰𑌣𑌾𑌯𑌾𑌂 𑌮𑌦𑌨𑍍𑌤𑌿𑌮𑌦𑌶𑌾𑌯𑌾𑌮𑍍 𑌇𑌤𑌿 𑌯𑌾𑌵𑌤𑍍 । 𑌏𑌹𑌿 𑌆𑌯𑌾𑌹𑌿 𑌇𑌣𑍍 𑌗𑌤𑍌 𑌇𑌤𑍍𑌯𑌸𑍍𑌮𑌾𑌤𑍍 𑌆𑌙𑍍𑌯𑍋𑌗𑍇𑌨 𑌲𑍋𑌟𑌿 𑌮𑌧𑍍𑌯𑌮𑍈𑌕𑌵𑌚𑌨𑍇 । 𑌰𑌮𑌯𑌾 𑌸𑌹 𑌲𑌕𑍍𑌷𑍍𑌮𑍍𑌯𑌾 𑌸𑌾𑌕𑌮𑍍 । 𑌶𑌰𑌣𑍍𑌯 𑌶𑌰𑌣𑌮𑌿𑌵 𑌶𑌰𑌣𑌾𑌤𑍍 𑌶𑌾𑌖𑌾𑌦𑌿𑌭𑍍𑌯𑍋 𑌯𑌃 𑌇𑌤𑍍𑌯𑌸𑍍𑌮𑌾𑌤𑍍 𑌶𑌰𑌣𑍍𑌯𑌃 𑌯𑌦𑍍𑌵𑌾 𑌶𑍃𑌣𑌾𑌤𑌿 𑌭𑌯𑌮𑌿𑌤𑌿 𑌶𑍄 𑌹𑌿𑌂𑌸𑌾𑌯𑌾𑌮𑌿𑌤𑍍𑌯𑌸𑍍𑌮𑌾𑌤𑍍 𑌶𑍄𑌰𑌮𑍍𑌯𑍋𑌶𑍍𑌚 𑌇𑌤𑍍𑌯𑌨𑍇𑌨 𑌅𑌨𑍍𑌯𑌃 𑌇𑌤𑌿 𑌔𑌣𑌾𑌦𑌿𑌕𑍍𑌯𑌾 𑌵𑍍𑌯𑍁𑌤𑍍𑌪𑌤𑍍𑌤𑍍𑌯𑌾 𑌶𑌰𑌣𑍍𑌯𑌃 𑌸𑌮𑍍𑌬𑍁𑌦𑍍𑌧𑍌 । 𑌰𑌮𑌯𑌾 𑌸𑌹 𑌶𑌰𑌣𑍍𑌯 𑌇𑌤𑌿 𑌸𑌨𑍍𑌨𑌿𑌧𑍇𑌃 𑌤𑌾𑌤𑍍𑌪𑌰𑍍𑌯𑌂 𑌰𑌮𑌯𑌾 𑌸𑌹𑌿𑌤𑌤𑍍𑌵𑌾𑌤𑍍 𑌏𑌵 𑌶𑌰𑌣𑍍𑌯𑌤𑍍𑌵𑌂 𑌸𑌮𑍍𑌪𑍂𑌰𑍍𑌣𑌤𑍍𑌵𑌂 𑌗𑌚𑍍𑌛𑌤𑍀𑌤𑌿 𑌶𑍍𑌰𑌿𑌯𑌃 𑌪𑍁𑌰𑍁𑌷𑌕𑌾𑌰𑌤𑍍𑌵𑌂 𑌦𑍍𑌯𑍋𑌤𑌿𑌤𑌮𑍍 । 𑌵𑌿𑌹𑌗𑌾𑌨𑌾𑌂 𑌵𑌿𑌹𑌾𑌯𑌸𑌾 𑌗𑌚𑍍𑌛𑌤𑍀𑌤𑌿 । 𑌪𑍍𑌰𑌿𑌯𑌵𑌶𑍇 𑌵𑌦𑌃 𑌖𑌚𑍍 𑌇𑌤𑍍𑌯𑌤𑍍𑌰 𑌗𑌮𑍇𑌃 𑌸𑍁𑌪𑍍𑌯𑍁𑌪𑌸𑌙𑍍𑌖𑍍𑌯𑌾𑌨𑌮𑌿𑌤𑍍𑌯𑌸𑍍𑌮𑌾𑌤𑍍 𑌖𑌚𑍍𑌚 𑌡𑌿𑌦𑍍𑌵𑌾 𑌵𑌕𑍍𑌤𑌵𑍍𑌯𑌃 𑌇𑌤𑌿 𑌡𑌿𑌤𑍍𑌤𑍍𑌵𑌾𑌤𑍍 𑌡𑍇 𑌚 𑌵𑌿𑌹𑌾𑌯𑌸𑍋 𑌵𑌿𑌹𑌾𑌦𑍇𑌶𑍋 𑌵𑌕𑍍𑌤𑌵𑍍𑌯𑌃 𑌇𑌤𑍍𑌯𑌸𑍍𑌮𑌾𑌚𑍍𑌚 𑌵𑌿𑌹𑌗𑌃 । 𑌤𑍇𑌷𑌾𑌂 𑌵𑌿𑌹𑌗𑌾𑌨𑌾𑌂 𑌨𑌾𑌥𑌃 𑌗𑌰𑍁𑌡𑌃 𑌤𑌮𑍍 𑌅𑌧𑌿𑌰𑍁𑌹𑍍𑌯 𑌆𑌰𑍁𑌹𑍍𑌯 𑌏𑌹𑍀𑌤𑍍𑌯𑌨𑍍𑌵𑌯𑌃 । 𑌗𑌰𑍁𑌤𑍍𑌮𑌤𑌃 𑌅𑌤𑌿𑌦𑍍𑌰𑍁𑌤𑌤𑍍𑌵𑌾𑌤𑍍 𑌕𑍍𑌷𑌿𑌪𑍍𑌰𑌤𑍍𑌵𑌯𑌾𑌚𑌨𑌾𑌵𑌗𑌮𑍍𑌯𑌾 । 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹𑍇𑌤𑌿 𑌦𑍍𑌵𑌿𑌃 𑌸𑌮𑍍𑌬𑍁𑌦𑍍𑌧𑍌 । 𑌮𑍋𑌕𑍍𑌷𑌪𑍍𑌰𑌦𑌾𑌯𑌕𑌮𑍍 𑌅𑌨𑍍𑌤𑌿𑌮𑌸𑍍𑌮𑌰𑌣𑌂 𑌶𑌾𑌨𑍍𑌤𑌸𑍍𑌤𑌿𑌥𑍌 𑌨 𑌸𑌮𑍍𑌪𑌦𑍍𑌯𑍇𑌤 𑌵𑌿𑌨𑌾 𑌭𑌗𑌵𑌤𑍍𑌸𑌙𑍍𑌕𑌲𑍍𑌪𑌾𑌤𑍍 𑌕𑌿𑌮𑍁𑌤 𑌇𑌨𑍍𑌦𑍍𑌰𑌿𑌯𑍇𑌷𑍍𑌵𑌨𑍍𑌤𑌰𑍍𑌭𑍂𑌤𑌾𑌯𑌾𑌂 𑌬𑍁𑌦𑍍𑌧𑍍𑌯𑌾𑌂 𑌕𑍍𑌲𑍇𑌶𑌵𑌿𑌵𑌶𑍀𑌕𑍃𑌤𑌾𑌯𑌾𑌮𑌿𑌤𑌿 𑌤𑌾𑌤𑍍𑌪𑌰𑍍𑌯𑌮𑍍 ।

𑌹𑌾𑌟𑌕𑌕𑌿𑌰𑍀𑌟𑌵𑌰𑌹𑌾𑌰𑌵𑌨𑌮𑌾𑌲𑌾𑌧𑌾𑌰𑌰𑌶𑌨𑌾𑌮𑌕𑌰𑌕𑍁𑌣𑍍𑌡𑌲𑌮𑌣𑍀𑌨𑍍𑌦𑍍𑌰𑍈𑌃 ।
𑌭𑍂𑌷𑌿𑌤𑌮𑌶𑍇𑌷𑌨𑌿𑌲𑌯𑌂 𑌤𑌵 𑌵𑌪𑍁𑌰𑍍𑌮𑍇 𑌚𑍇𑌤𑌸𑌿 𑌚𑌕𑌾𑌸𑍍𑌤𑍁 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹 ॥ ௬ ॥

𑌹𑌾𑌟𑌕𑌂 𑌸𑍁𑌵𑌰𑍍𑌣𑌂 𑌤𑍇𑌨 𑌹𑌾𑌟𑌕𑍇𑌨 𑌨𑌿𑌰𑍍𑌮𑌿𑌤𑌃 𑌹𑌾𑌟𑌕𑌨𑌿𑌰𑍍𑌮𑌿𑌤𑌃 𑌕𑍀𑌰𑍀𑌟𑌃 𑌮𑍁𑌕𑍁𑌟𑌃 𑌹𑌾𑌟𑌕𑌕𑌿𑌰𑍀𑌟𑌃 𑌮𑌧𑍍𑌯𑌮𑌪𑌦𑌲𑍋𑌪𑌿𑌸𑌮𑌾𑌸𑌾𑌤𑍍 । 𑌵𑌰𑌃 𑌶𑍍𑌰𑍇𑌷𑍍𑌠𑌃 𑌹𑌾𑌰𑌃 𑌮𑍁𑌕𑍍𑌤𑌾𑌵𑌲𑍀 𑌵𑌰𑌹𑌾𑌰𑌃 । 𑌵𑌨𑌮𑌾𑌲𑌾 𑌵𑌨𑍋𑌦𑍍𑌭𑌵𑌪𑍁𑌷𑍍𑌪𑌰𑌚𑌿𑌤𑌾 𑌮𑌾𑌲𑌾 𑌮𑌧𑍍𑌯𑌮𑌪𑌦𑌲𑍋𑌪𑌿𑌸𑌮𑌾𑌸𑌾𑌤𑍍 । 𑌵𑌨𑌮𑌾𑌲𑌾 𑌵𑌿𑌶𑌿𑌷𑍍𑌯 𑌶𑍍𑌰𑍀𑌮𑌨𑍍𑌨𑌾𑌰𑌾𑌯𑌣𑌸𑍍𑌯 𑌮𑌾𑌲𑌾 । 𑌧𑌾𑌰𑌰𑌶𑌨𑌾 𑌧𑌾𑌰𑌾 𑌗𑌮𑍍𑌭𑍀𑌰𑌾 𑌚𑌾𑌸𑍌 𑌰𑌶𑌨𑌾 𑌕𑌾𑌞𑍍𑌚𑍀 𑌚 𑌧𑌾𑌰𑌰𑌶𑌨𑌾 । 𑌮𑌕𑌰𑌕𑍁𑌣𑍍𑌡𑌲𑍇 𑌕𑍁𑌣𑍍𑌡𑌲𑍇 𑌭𑍂𑌷𑌣𑌵𑌿𑌶𑍇𑌷𑍌 𑌮𑌕𑌰𑍌 𑌜𑌲𑌜𑌨𑍍𑌤𑍁𑌵𑌿𑌶𑍇𑌷𑍌 𑌇𑌵 𑌮𑌕𑌰𑌕𑍁𑌣𑍍𑌡𑌲𑍇 𑌉𑌪𑌮𑌿𑌤𑌸𑌮𑌾𑌸𑌾𑌤𑍍 । 𑌮𑌣𑍀𑌨𑍍𑌦𑍍𑌰𑌾𑌃 𑌮𑌣𑍀𑌨𑌾𑌂 𑌰𑌤𑍍𑌨𑌾𑌨𑌾𑌮𑍍 𑌇𑌨𑍍𑌦𑍍𑌰𑌾𑌃 𑌶𑍍𑌰𑍇𑌷𑍍𑌠𑌾𑌃 । 𑌹𑌾𑌟𑌕𑌕𑌿𑌰𑍀𑌟𑌶𑍍𑌚 𑌵𑌰𑌹𑌾𑌰𑌶𑍍𑌚 𑌵𑌨𑌮𑌾𑌲𑌾 𑌚 𑌧𑌾𑌰𑌰𑌶𑌨𑌾 𑌚 𑌮𑌕𑌰𑌕𑍁𑌣𑍍𑌡𑌲𑍇 𑌚 𑌮𑌣𑍀𑌨𑍍𑌦𑍍𑌰𑌾𑌶𑍍𑌚 𑌹𑌾𑌟𑌕𑌕𑌿𑌰𑍀𑌟𑌵𑌰𑌹𑌾𑌰𑌵𑌨𑌮𑌾𑌲𑌾𑌧𑌾𑌰𑌰𑌶𑌨𑌾𑌮𑌕𑌰𑌕𑍁𑌣𑍍𑌡𑌲𑌮𑌣𑍀𑌨𑍍𑌦𑍍𑌰𑌾𑌃 𑌤𑍈𑌃 । 𑌭𑍂𑌷𑌿𑌤𑌂 𑌮𑌣𑍍𑌡𑌿𑌤𑌮𑍍 । 𑌅𑌶𑍇𑌷𑌨𑌿𑌲𑌯𑌮𑍍 𑌅𑌶𑍇𑌷𑌾𑌃 𑌸𑌰𑍍𑌵𑍇 । 𑌨𑌿𑌲𑌯𑌾𑌃 𑌗𑍃𑌹𑌾𑌃 𑌨𑌿𑌲𑍀𑌯𑌤𑍇𑌸𑍍𑌮𑌿𑌨𑍍𑌨𑌿𑌤𑍍𑌯𑌧𑌿𑌅𑌰𑌣𑍇𑌚𑍍 𑌏𑌰𑌚𑍍 𑌇𑌤𑍍𑌯𑌸𑍍𑌮𑌾𑌤𑍍 । 𑌅𑌶𑍇𑌷𑌾𑌃 𑌨𑌿𑌲𑌯𑌾𑌃 𑌯𑌸𑍍𑌮𑌿𑌨𑍍 𑌤𑌤𑍍 𑌅𑌶𑍇𑌷𑌨𑌿𑌲𑌯𑌮𑍍 । 𑌤𑌵 𑌤𑍇 𑌵𑌪𑍁𑌃 𑌶𑌰𑍀𑌰𑌮𑍍 𑌵𑌪𑍇𑌃 𑌅𑌰𑍍𑌤𑌿𑌪𑍄𑌵𑌪𑌿𑌯𑌜𑍀𑌤𑌿 𑌔𑌣𑌾𑌤𑌿𑌕𑍀 𑌸𑌿𑌦𑍍𑌧𑌿𑌃 । 𑌚𑍇𑌤𑌸𑌿 𑌮𑌾𑌨𑌸𑍇 𑌚𑌕𑌾𑌸𑍍𑌤𑍁 𑌦𑍀𑌪𑍍𑌯𑌤𑌾𑌮𑍍 । 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹𑍇𑌤𑌿 𑌦𑍍𑌵𑌿𑌃 𑌸𑌮𑍍𑌬𑍁𑌦𑍍𑌧𑍌 । 𑌕𑍇𑌶𑌾𑌦𑌿𑌪𑌾𑌦𑌵𑌰𑍍𑌣𑌨𑌮𑍍 ।

𑌇𑌨𑍍𑌦𑍁𑌰𑌵𑌿𑌪𑌾𑌵𑌕𑌵𑌿𑌲𑍋𑌚𑌨 𑌰𑌮𑌾𑌯𑌾 𑌮𑌨𑍍𑌦𑌿𑌰 𑌮𑌹𑌾𑌭𑍁𑌜 𑌲𑌸𑌦𑍍𑌵𑌰𑌰𑌥𑌾𑌙𑍍𑌗 ।
𑌸𑍁𑌨𑍍𑌦𑌰 𑌚𑌿𑌰𑌾𑌯 𑌰𑌮𑌤𑌾𑌂 𑌤𑍍𑌵𑌯𑌿 𑌮𑌨𑍋 𑌮𑍇 𑌨𑌨𑍍𑌦𑌿𑌤𑌸𑍁𑌰𑍇𑌶 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹 ॥ ௭ ॥

𑌇𑌨𑍍𑌧𑍁𑌃 𑌚𑌨𑍍𑌦𑍍𑌰𑌮𑌾𑌶𑍍𑌚 𑌰𑌵𑌿𑌃 𑌸𑍂𑌰𑍍𑌯𑌶𑍍𑌚 𑌪𑌾𑌵𑌕𑍋𑌗𑍍𑌨𑌿𑌶𑍍𑌚 𑌵𑌿𑌲𑍋𑌚𑌨𑌾𑌨𑌿 𑌨𑌯𑌨𑌾𑌨𑌿 𑌯𑌸𑍍𑌯 𑌸𑌃 𑌇𑌨𑍍𑌦𑍁𑌰𑌵𑌿𑌪𑌾𑌵𑌕𑌵𑌿𑌲𑍋𑌚𑌨𑌃 𑌸𑌮𑍍𑌬𑍁𑌦𑍍𑌧𑍌 । 𑌈𑌶𑌾𑌨𑌸𑍍𑌯 𑌤𑍍𑌰𑌿𑌨𑍇𑌤𑍍𑌰𑌤𑍍𑌵𑌂 𑌲𑌕𑍍𑌷𑌣𑌂 𑌨𑍃𑌸𑌿𑌂𑌹𑌸𑍍𑌯𑌾𑌪𑌿 । 𑌰𑌮𑌾𑌯𑌾𑌃 𑌶𑍍𑌰𑌿𑌯𑌃 𑌮𑌨𑍍𑌦𑌿𑌰 𑌵𑌾𑌸𑌸𑍍𑌥𑌾𑌨𑌂 𑌸𑌮𑍍𑌬𑍁𑌦𑍍𑌧𑍌 । 𑌮𑌹𑌾𑌨𑍍𑌤𑌃 𑌭𑍁𑌜𑌾𑌃 𑌚𑌤𑍍𑌵𑌾𑌰𑍋 𑌯𑌸𑍍𑌯 𑌸𑌃 𑌮𑌹𑌾𑌭𑍁𑌜𑌃 𑌸𑌮𑍍𑌬𑍁𑌦𑍍𑌧𑍌 𑌆𑌨𑍍𑌮𑌹𑌤𑌃 𑌸𑌮𑌾𑌨𑌾𑌧𑌿𑌕𑌰𑌣𑌜𑌾𑌤𑍀𑌯𑌯𑍋𑌃 𑌇𑌤𑍍𑌯𑌸𑍍𑌮𑌾𑌤𑍍 𑌮𑌹𑌤𑍍𑌪𑍍𑌰𑌾𑌤𑌿𑌪𑌦𑌿𑌕𑌸𑍍𑌯 𑌮𑌹𑌾 𑌇𑌤𑍍𑌯𑌾𑌦𑍇𑌶𑌃 । 𑌲𑌸𑌤𑍍 𑌰𑌾𑌜𑌮𑌾𑌨𑌮𑍍 । 𑌵𑌰𑌂 𑌶𑍍𑌰𑍇𑌷𑍍𑌠𑌮𑍍 । 𑌰𑌥𑌸𑍍𑌯 𑌅𑌙𑍍𑌗𑌂 𑌰𑌥𑌾𑌙𑍍𑌗𑌂 𑌚𑌕𑍍𑌰𑌮𑍍 । 𑌵𑌰𑌂 𑌰𑌥𑌾𑌙𑍍𑌗𑌂 𑌵𑌰𑌰𑌥𑌾𑌙𑍍𑌗𑌮𑍍 । 𑌲𑌸𑌤𑍍 𑌵𑌰𑌰𑌥𑌾𑌙𑍍𑌗𑌂 𑌸𑍁𑌦𑌰𑍍𑌶𑌨𑌨𑌾𑌮 𑌯𑌸𑍍𑌯 𑌸𑌃 𑌲𑌸𑌦𑍍𑌵𑌰𑌰𑌥𑌾𑌙𑍍𑌗𑌃 𑌸𑌮𑍍𑌬𑍁𑌦𑍍𑌧𑍌 । 𑌸𑍁𑌨𑍍𑌦𑌰𑌃 𑌸𑍁𑌷𑍍𑌠𑍁 𑌉𑌨𑌤𑍍𑌤𑌿 𑌆𑌰𑍍𑌦𑍍𑌰𑍀𑌕𑌰𑍋𑌤𑌿 𑌚𑌿𑌤𑍍𑌤𑌮𑌿𑌤𑌿 𑌸𑍁 𑌇𑌤𑍍𑌯𑌸𑍍𑌮𑌾𑌤𑍍 𑌉𑌨𑍍𑌦 𑌕𑍍𑌲𑍇𑌦𑌨𑍇 𑌇𑌤𑍍𑌯𑌸𑍍𑌮𑌾𑌤𑍍 𑌅𑌰 𑌇𑌤𑍍𑌯𑌨𑍇𑌨 𑌶𑌕𑌨𑍍𑌧𑍍𑌵𑌾𑌦𑌿𑌤𑍍𑌵𑌾𑌤𑍍 𑌨𑌿𑌷𑍍𑌪𑌨𑍍𑌨𑌂 𑌸𑌮𑍍𑌬𑍁𑌦𑍍𑌧𑍌 । 𑌚𑌿𑌰𑌾𑌯 𑌦𑍀𑌰𑍍𑌘𑌕𑌾𑌲𑌂 𑌰𑌮𑌤𑌾𑌂 𑌕𑍍𑌰𑍀𑌡𑌤𑍁 𑌤𑍍𑌵𑌯𑌿 𑌤𑌵 𑌅𑌨𑍍𑌤𑌃 𑌮𑌨𑌃 𑌚𑍇𑌤𑌃 𑌮𑍇 𑌮𑌮 । 𑌨𑌨𑍍𑌦𑌿𑌤𑌸𑍁𑌰𑍇𑌶 𑌨𑌨𑍍𑌦𑌿𑌤𑌃 𑌸𑌮𑍃𑌦𑍍𑌧𑌃 𑌸𑍁𑌰𑍇𑌶𑌃 𑌸𑍁𑌰𑌾𑌣𑌾𑌮𑍍 𑌈𑌶𑌃 𑌇𑌨𑍍𑌦𑍍𑌰𑌃 𑌯𑍇𑌨 𑌸𑌃 𑌭𑌗𑌵𑌦𑌨𑍁𑌗𑍍𑌰𑌹𑌾𑌦𑍇𑌵 𑌇𑌨𑍍𑌦𑍍𑌰𑌸𑍍𑌯 𑌮𑌙𑍍𑌗𑌲𑌮𑌿𑌤𑌿 𑌨𑍃𑌸𑌿𑌂𑌹𑌃 𑌨𑌨𑍍𑌦𑌿𑌤𑌸𑍁𑌰𑍇𑌶𑌃 𑌸𑌮𑍍𑌬𑍁𑌦𑍍𑌧𑍌 । 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹𑍇𑌤𑌿 𑌦𑍍𑌵𑌿𑌃 𑌸𑌮𑍍𑌬𑍁𑌦𑍍𑌧𑍌 । 𑌦𑍍𑌵𑌿𑌤𑍀𑌯𑌾𑌕𑍍𑌷𑌰𑌪𑍍𑌰𑌾𑌸𑌾𑌲𑌙𑍍𑌕𑌾𑌰𑌃 ।

𑌮𑌾𑌧𑌵 𑌮𑍁𑌕𑍁𑌨𑍍𑌦 𑌮𑌧𑍁𑌸𑍂𑌦𑌨 𑌮𑍁𑌰𑌾𑌰𑍇 𑌵𑌾𑌮𑌨 𑌨𑍃𑌸𑌿𑌂𑌹 𑌶𑌰𑌣𑌂 𑌭𑌵 𑌨𑌤𑌾𑌨𑌾𑌮𑍍 ।
𑌕𑌾𑌮𑌦 𑌘𑍃𑌣𑌿𑌨𑍍𑌨𑌖𑌿𑌲𑌕𑌾𑌰𑌣 𑌨𑌯𑍇𑌯𑌂 𑌕𑌾𑌲𑌮𑌮𑌰𑍇𑌶 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹 ॥ ௮ ॥

𑌮𑌾𑌧𑌵 𑌮𑌾𑌯𑌾𑌃 𑌮𑌹𑌾𑌲𑌕𑍍𑌷𑍍𑌮𑍍𑌯𑌾𑌃 𑌧𑌵𑌃 𑌪𑌤𑌿𑌃 𑌯𑌦𑍍𑌵𑌾 𑌯𑌦𑍁𑌪𑍁𑌤𑍍𑌤𑍍𑌰𑌸𑍍𑌯 𑌮𑌧𑍋𑌰𑌪𑌤𑍍𑌯𑌂 𑌪𑍁𑌮𑌾𑌨𑍍 𑌮𑌧𑍁𑌪𑍍𑌰𑌾𑌤𑌿𑌪𑌦𑌿𑌕𑌾𑌤𑍍 𑌅𑌣𑍍𑌪𑍍𑌰𑌤𑍍𑌯𑌯𑍇𑌨 𑌸𑌮𑍍𑌬𑍁𑌦𑍍𑌧𑍌 । 𑌮𑍁𑌕𑍁𑌨𑍍𑌦 𑌮𑍁𑌉𑌂 𑌮𑍋𑌕𑍍𑌷𑌂 𑌦𑌦𑌾𑌤𑍀𑌤𑌿 𑌸𑌮𑍍𑌬𑍁𑌦𑍍𑌧𑍌 । 𑌮𑌧𑍁𑌸𑍂𑌦𑌨 𑌮𑌧𑍂𑌃 𑌤𑌨𑍍𑌨𑌾𑌮𑍍𑌨𑍍𑌃 𑌅𑌸𑍁𑌰𑌸𑍍𑌯 𑌸𑍂𑌦𑌯𑌤𑍀𑌤𑌿 𑌸𑍂𑌦𑌨𑌃 𑌲𑍍𑌯𑍁𑌃 𑌇𑌤𑍍𑌯𑌸𑍍𑌮𑌾𑌤𑍍 𑌇𑌤𑌿 𑌮𑌧𑍁𑌸𑍂𑌦𑌨𑌃 𑌸𑌮𑍍𑌬𑍁𑌦𑍍𑌧𑍌 । 𑌮𑍁𑌰𑌾𑌰𑍇 𑌮𑍁𑌰𑌸𑍍𑌯 𑌤𑌨𑍍𑌨𑌾𑌮𑍍𑌨𑌃 𑌅𑌸𑍁𑌰𑌸𑍍𑌯 𑌅𑌰𑌿𑌃 𑌶𑌤𑍍𑌰𑍁𑌃 𑌘𑌾𑌤𑌕𑌤𑍍𑌵𑌾𑌤𑍍 𑌸𑌮𑍍𑌬𑍁𑌦𑍍𑌧𑍌 । 𑌵𑌾𑌮𑌨 𑌶𑍍𑌰𑍀𑌮𑌨𑍍𑌨𑌾𑌰𑌾𑌯𑌣𑌸𑍍𑌯 𑌪𑌞𑍍𑌚𑌮𑌃 𑌅𑌵𑌤𑌾𑌰𑌃 𑌸𑌮𑍍𑌬𑍁𑌦𑍍𑌧𑍌 । 𑌨𑍃𑌸𑌿𑌂𑌹 𑌨𑌾 𑌚𑌾𑌸𑍌 𑌸𑌿𑌂𑌹𑌶𑍍𑌚𑍇𑌤𑌿 𑌶𑍍𑌰𑍀𑌮𑌨𑍍𑌨𑌾𑌰𑌾𑌯𑌣𑌸𑍍𑌯 𑌚𑌤𑍁𑌰𑍍𑌥𑌃 𑌅𑌵𑌤𑌾𑌰𑌃 𑌅𑌸𑍍𑌯 𑌸𑍍𑌤𑍋𑌤𑍍𑌰𑌸𑍍𑌯 𑌦𑍇𑌵𑌤𑌾 𑌚 𑌸𑌮𑍍𑌬𑍁𑌦𑍍𑌧𑍌 । 𑌶𑌰𑌣𑌂 𑌰𑌕𑍍𑌷𑌿𑌤𑌾 𑌭𑌵 𑌵𑌰𑍍𑌤𑌸𑍍𑌵 𑌨𑌤𑌾𑌨𑌾𑌂 𑌵𑌨𑍍𑌦𑌮𑌾𑌨𑌾𑌨𑌾𑌂 𑌕𑌰𑍍𑌮𑌣𑌃 𑌷𑌷𑍍𑌠𑍀 । 𑌕𑌾𑌮𑌦 𑌕𑌾𑌮𑌮𑍍 𑌅𑌭𑍀𑌷𑍍𑌟𑌂 𑌦𑌦𑌾𑌤𑍀𑌤𑌿 𑌸𑌮𑍍𑌬𑍁𑌦𑍍𑌧𑍌 । 𑌘𑍃𑌣𑌿𑌨𑍍 𑌘𑍃𑌣𑌾 𑌕𑌰𑍁𑌣𑌾 𑌅𑌸𑍍𑌯 𑌅𑌸𑍍𑌤𑍀𑌤𑌿 𑌕𑌾𑌰𑍁𑌣𑌿𑌕𑌃 𑌸𑌮𑍍𑌬𑍁𑌦𑍍𑌧𑍌 । 𑌅𑌖𑌿𑌲𑌕𑌾𑌰𑌣 𑌅𑌖𑌿𑌲𑌸𑍍𑌯 𑌸𑌰𑍍𑌵𑌸𑍍𑌯 𑌕𑌾𑌰𑌣𑌂 𑌬𑍀𑌜𑌂 𑌸𑌮𑍍𑌬𑍁𑌦𑍍𑌧𑍌 । 𑌨𑌯𑍇𑌯𑌂 𑌯𑌾𑌪𑌯𑍇𑌯𑌂 𑌕𑌾𑌲𑌂 𑌸𑌮𑌯𑌂 𑌤𑌵 𑌨𑌾𑌮𑌸𑍍𑌮𑌰𑌣𑍇𑌨𑍈𑌵 𑌇𑌤𑌿 । 𑌅𑌮𑌰𑍇𑌶 𑌅𑌮𑌰𑌾𑌣𑌾𑌂 𑌸𑍁𑌰𑌾𑌣𑌾𑌮𑍍 𑌈𑌶𑌃 𑌪𑍍𑌰𑌭𑍁𑌃 𑌸𑌮𑍍𑌬𑍁𑌦𑍍𑌧𑍌 । 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹𑍇𑌤𑌿 𑌦𑍍𑌵𑌿𑌃 𑌸𑌮𑍍𑌬𑍁𑌦𑍍𑌧𑍌 ।

𑌅𑌷𑍍𑌟𑌕𑌮𑌿𑌦𑌂 𑌸𑌕𑌲𑌪𑌾𑌤𑌕𑌭𑌯𑌘𑍍𑌨𑌂 𑌕𑌾𑌮𑌦𑌮𑌶𑍇𑌷𑌦𑍁𑌰𑌿𑌤𑌾𑌮𑌯𑌰𑌿𑌪𑍁𑌘𑍍𑌨𑌮𑍍 ।
𑌯𑌃 𑌪𑌠𑌤𑌿 𑌸𑌨𑍍𑌤𑌤𑌮𑌶𑍇𑌷𑌨𑌿𑌲𑌯𑌂 𑌤𑍇 𑌗𑌚𑍍𑌛𑌤𑌿 𑌪𑌦𑌂 𑌸 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹 ॥ ௯ ॥

𑌅𑌷𑍍𑌟𑌕𑌮𑍍 𑌅𑌷𑍍𑌟𑌶𑍍𑌲𑍋𑌕𑌵𑌿𑌶𑌿𑌷𑍍𑌟𑌂 𑌸𑍍𑌤𑍋𑌤𑍍𑌰𑌮𑍍 𑌇𑌦𑌂 𑌪𑌠𑍍𑌯𑌮𑌾𑌨𑌂 𑌤𑌤𑍍 𑌦𑍍𑌵𑌿𑌤𑍀𑌯𑌾𑌯𑌾𑌮𑍍 । 𑌸𑌕𑌲𑌾𑌨𑌿 𑌸𑌮𑌸𑍍𑌤𑌾𑌨𑌿 𑌪𑌾𑌤𑌕𑌾𑌨𑌿 𑌪𑌾𑌤𑌯𑌨𑍍𑌤𑍀𑌤𑌿 𑌨𑌰𑌕𑌸𑌾𑌧𑌨𑌾𑌨𑌿 𑌸𑌕𑌲𑌪𑌾𑌤𑌕𑌾𑌨𑌿 । 𑌤𑍇𑌭𑍍𑌯𑍋 𑌭𑌯𑌂 𑌸𑌕𑌲𑌪𑌾𑌤𑌕𑌭𑌯𑌮𑍍 । 𑌤𑌤𑍍 𑌭𑌯𑌂 𑌹𑌨𑍍𑌤𑍀𑌤𑌿 𑌸𑌕𑌲𑌪𑌾𑌤𑌕𑌭𑌯𑌘𑍍𑌨𑌂 𑌕𑌪𑍍𑌰𑌕𑌰𑌣𑍇 𑌮𑍂𑌲𑌵𑌿𑌭𑍁𑌜𑌾𑌦𑌿𑌭𑍍𑌯 𑌉𑌪𑌸𑌙𑍍𑌖𑍍𑌯𑌾𑌨𑌮𑍍 𑌇𑌤𑍍𑌯𑌸𑍍𑌮𑌾𑌤𑍍 𑌦𑍍𑌵𑌿𑌤𑍀𑌯𑌾𑌯𑌾𑌮𑍍 । 𑌕𑌾𑌮𑌦𑌂 𑌕𑌾𑌮𑌮𑍍 𑌅𑌭𑍀𑌷𑍍𑌟𑌂 𑌦𑌦𑌾𑌤𑍀𑌤𑌿 । 𑌅𑌶𑍇𑌷𑌾𑌣𑌿 𑌸𑌰𑍍𑌵𑌾𑌣𑌿 । 𑌦𑍁𑌰𑌿𑌤𑌾𑌨𑌿 𑌪𑌾𑌪𑌾𑌨𑌿 𑌚 𑌆𑌮𑌯𑌾𑌃 𑌰𑍋𑌗𑌾𑌶𑍍𑌚 𑌰𑌿𑌪𑌵𑌃 𑌶𑌤𑍍𑌰𑌵𑌶𑍍𑌚 𑌦𑍁𑌰𑌿𑌤𑌾𑌮𑌯𑌰𑌿𑌪𑍂𑌣𑌿 । 𑌅𑌶𑍇𑌷𑌾𑌣𑌿 𑌦𑍁𑌰𑌿𑌤𑌾𑌮𑌯𑌰𑌿𑌪𑍂𑌣𑌿 𑌅𑌶𑍇𑌷𑌦𑍁𑌰𑌿𑌤𑌾𑌮𑌯𑌰𑌿𑌪𑍂𑌣𑌿 । 𑌤𑌾𑌨𑌿 𑌹𑌨𑍍𑌤𑍀𑌤𑌿 𑌅𑌶𑍇𑌷𑌦𑍁𑌰𑌿𑌤𑌾𑌮𑌯𑌰𑌿𑌪𑍁𑌘𑍍𑌨𑌂 𑌪𑍁𑌨𑌶𑍍𑌚 𑌮𑍂𑌲𑌵𑌿𑌭𑍁𑌜𑌾𑌦𑌿𑌤𑍍𑌵𑌾𑌤𑍍 𑌦𑍍𑌵𑌿𑌤𑍀𑌯𑌾𑌯𑌾𑌮𑍍 । 𑌯𑌃 𑌯𑌕𑌃 𑌪𑌠𑌤𑌿 𑌵𑌕𑍍𑌤𑌿 𑌇𑌦𑌮𑌷𑍍𑌟𑌕𑌮𑌿𑌤𑌿 𑌯𑌾𑌵𑌤𑍍 । 𑌸𑌨𑍍𑌤𑌤𑌂 𑌨𑌿𑌰𑌨𑍍𑌤𑌰𑌮𑍍 । 𑌅𑌶𑍇𑌷𑌨𑌿𑌲𑌯𑌮𑍍 𑌅𑌶𑍇𑌷𑌾𑌃 𑌸𑌰𑍍𑌵𑍇 𑌨𑌿𑌲𑌯𑌾𑌃 𑌗𑍃𑌹𑌾𑌃 𑌯𑌸𑍍𑌮𑌿𑌨𑍍 𑌤𑌤𑍍 𑌦𑍍𑌵𑌿𑌤𑍀𑌯𑌾𑌯𑌾𑌮𑍍 । 𑌤𑌵 𑌤𑍇 । 𑌗𑌚𑍍𑌛𑌤𑌿 𑌯𑌾𑌤𑌿 । 𑌪𑌦𑌂 𑌸𑍍𑌥𑌾𑌨𑌂 𑌵𑍈𑌕𑍁𑌣𑍍𑌠𑌨𑌾𑌮𑌕𑌂 𑌦𑍍𑌵𑌿𑌤𑍀𑌯𑌾𑌯𑌾𑌂 𑌗𑌚𑍍𑌛𑌤𑍀𑌤𑌿 𑌯𑌾𑌵𑌤𑍍 । 𑌸𑌃 𑌤𑌥𑌾𑌭𑍂𑌤𑌃 । 𑌨𑌰𑌸𑌿𑌂𑌹 𑌨𑌰𑌸𑌿𑌂𑌹𑍇𑌤𑌿 𑌦𑍍𑌵𑌿𑌃 𑌸𑌮𑍍𑌬𑍁𑌦𑍍𑌧𑍌 । 𑌦𑍇𑌵𑌤𑌾𑌮𑍁𑌦𑍍𑌦𑌿𑌶𑍍𑌯 𑌫𑌲𑌶𑍍𑌰𑍁𑌤𑌿𑌵𑌚𑌨𑌂 𑌵𑌿𑌚𑌿𑌤𑍍𑌰𑌂 𑌮𑌹𑌾𑌵𑌿𑌶𑍍𑌵𑌾𑌸𑌂 𑌦𑍍𑌯𑍋𑌤𑌯𑌤𑌿 ।

॥ 𑍐 ॥