𑌨𑌰𑌸𑌿𑌂𑌹𑌪𑌞𑍍𑌚𑌾𑌮𑍃𑌤𑌸𑍍𑌤𑍋𑌤𑍍𑌰𑌮𑍍

Mon, 20 May, 2019•ambarish•religion

𑌰𑌾𑌮𑌾𑌯 𑌰𑌾𑌮𑌭𑌦𑍍𑌰𑌾𑌯 𑌰𑌾𑌮𑌚𑌨𑍍𑌦𑍍𑌰𑌾𑌯 𑌵𑍇𑌧𑌸𑍇 ।
𑌰𑌘𑍁𑌨𑌾𑌥𑌾𑌯 𑌨𑌾𑌥𑌾𑌯 𑌸𑍀𑌤𑌾𑌯𑌾𑌃 𑌪𑌤𑌯𑍇 𑌨𑌮𑌃 ॥

𑌮𑌾𑌤𑍁𑌰𑍍𑌮𑌾𑌤𑌾𑌮𑌹𑌦𑌯𑌿𑌤𑌯𑌾 𑌯𑌚𑍍𑌚 𑌪𑌞𑍍𑌚𑌾𑌮𑍃𑌤𑌾𑌖𑍍𑌯𑌂 𑌸𑍍𑌤𑍋𑌤𑍍𑌰𑌂 𑌰𑌾𑌮𑌗𑍍𑌰𑌥𑌿𑌥𑌮𑌪𑌠𑌂 𑌨𑌾𑌰𑌸𑌿𑌂𑌹𑌂 𑌪𑍁𑌨𑌸𑍍𑌤𑌤𑍍 ।
𑌵𑍍𑌯𑌾𑌚𑌿𑌖𑍍𑌯𑌾𑌸𑍁𑌰𑍍𑌮𑌨𑌸𑌿 𑌵𑌿𑌦𑌧𑌦𑍍𑌰𑌾𑌜𑌲𑌕𑍍𑌷𑍍𑌮𑍀𑌂 𑌶𑍁𑌭𑌾𑌂 𑌤𑌾𑌂 𑌶𑍌𑌰𑍇𑌰𑍍𑌭𑌕𑍍𑌤𑌾𑌂 𑌪𑌰𑌮𑌪𑌦𑌗𑌾𑌂 𑌯𑌤𑍍𑌨𑌮𑍇𑌤𑌂 𑌕𑌰𑍋𑌮𑌿 ॥

𑌅𑌥 𑌸𑍍𑌤𑍋𑌤𑍍𑌰𑌮𑍍 ।

𑌅𑌹𑍋𑌬𑌿𑌲𑌂 𑌨𑌾𑌰𑌸𑌿𑌂𑌹𑌂 𑌗𑌤𑍍𑌵𑌾 𑌰𑌾𑌮𑌃 𑌪𑍍𑌰𑌤𑌾𑌪𑌵𑌾𑌨𑍍 ।
𑌨𑌮𑌸𑍍𑌕𑍃𑌤𑍍𑌵𑌾 𑌶𑍍𑌰𑍀𑌨𑍃𑌸𑌿𑌂𑌹𑌮𑌸𑍍𑌤𑍌𑌷𑍀𑌤𑍍𑌕𑌮𑌲𑌾𑌪𑌤𑌿𑌮𑍍 ॥

𑌶𑍍𑌲𑍋𑌕𑍋𑌯𑌮𑍍 𑌉𑌪𑌰𑍍𑌯𑍁𑌕𑍍𑌤𑌾𑌨𑌾𑌂 𑌪𑌦𑍍𑌯𑌾𑌨𑌾𑌂 𑌸𑌨𑍍𑌦𑌰𑍍𑌭𑌂 𑌧𑍍𑌵𑌨𑌯𑌤𑌿 । 𑌰𑌾𑌮𑌃 𑌶𑍍𑌰𑍀𑌰𑌾𑌮𑌚𑌨𑍍𑌦𑍍𑌰𑌃 । 𑌪𑍍𑌰𑌤𑌾𑌪𑌵𑌾𑌨𑍍 𑌤𑍇𑌜𑍋𑌮𑌯𑌃 । 𑌨𑌾𑌰𑌸𑌿𑌂𑌹𑌂 𑌨𑌰𑌸𑌿𑌂𑌹𑌸𑍍𑌯 𑌇𑌦𑌮𑌿𑌤𑌿 𑌤𑌦𑍍𑌧𑌿𑌤𑌵𑍃𑌦𑍍𑌧𑌿𑌃 । 𑌅𑌹𑍋𑌬𑌿𑌲𑌮𑍍 𑌆𑌨𑍍𑌧𑍍𑌰𑌦𑍇𑌶𑍇 𑌭𑌵𑌨𑌾𑌶𑌿𑌨𑍀𑌤𑍀𑌰𑍇 𑌪𑍍𑌰𑌖𑍍𑌯𑌾𑌤𑌂 𑌨𑌰𑌸𑌿𑌂𑌹𑌕𑍍𑌷𑍇𑌤𑍍𑌰𑌮𑍍 । 𑌤𑌦𑍍𑌗𑌤𑍍𑌵𑌾 𑌪𑍍𑌰𑌾𑌪𑍍𑌯 । 𑌨𑌮𑌸𑍍𑌕𑍃𑌤𑍍𑌵𑌾 𑌨𑌮𑌸𑍍𑌕𑍃𑌤𑍍𑌯 𑌨𑌮𑍋𑌵𑌾𑌚𑌂 𑌵𑌿𑌧𑌾𑌯 । 𑌸𑌾𑌕𑍍𑌷𑌾𑌤𑍍𑌪𑍍𑌰𑌭𑍃𑌤𑍀𑌨𑌿 𑌚 𑌇𑌤𑍍𑌯𑌤𑍍𑌰 𑌨𑌮𑌸𑌃 𑌸𑌾𑌕𑍍𑌷𑌾𑌤𑍍𑌪𑍍𑌰𑌭𑍃𑌤𑌿𑌤𑍍𑌵𑌾𑌤𑍍 𑌗𑌤𑌿𑌸𑌞𑍍𑌜𑍍𑌞𑌾𑌵𑌿𑌕𑌲𑍍𑌪𑌾𑌤𑍍 𑌲𑍍𑌯𑌬𑍍𑌵𑌿𑌕𑌲𑍍𑌪𑌾𑌤𑍍 𑌕𑍍𑌤𑍍𑌵𑌾𑌨𑍍𑌤𑌂 𑌸𑌿𑌧𑍍𑌯𑌤𑌿 । 𑌶𑍍𑌰𑍀𑌨𑍃𑌸𑌿𑌂𑌹𑌂 𑌶𑍍𑌰𑌿𑌯𑌾 𑌷𑌡𑍍𑌭𑌿𑌰𑍍𑌗𑍁𑌣𑍈𑌃 𑌸𑌹𑌿𑌤𑌂 𑌨𑌾 𑌚𑌾𑌸𑍌 𑌸𑌿𑌂𑌹𑌶𑍍𑌚 𑌨𑍃𑌸𑌿𑌂𑌹𑌸𑍍𑌤𑌂 । 𑌯𑌦𑍍𑌵𑌾 𑌶𑍍𑌰𑌿𑌯𑌾 𑌲𑌕𑍍𑌷𑍍𑌮𑍍𑌯𑌾 𑌸𑌹𑌿𑌤𑌂 𑌨𑍃𑌸𑌿𑌂𑌹𑌸𑍍𑌤𑌂 𑌕𑌮𑌲𑌾𑌪𑌤𑌿𑌂 𑌶𑍍𑌰𑌿𑌯𑍋 𑌨𑌿𑌤𑍍𑌯𑌾𑌨𑌪𑌾𑌯𑌿𑌤𑍍𑌵𑌾𑌤𑍍 । 𑌅𑌸𑍍𑌤𑍌𑌷𑍀𑌤𑍍 𑌪𑍍𑌰𑌾𑌶𑌂𑌸𑍀𑌤𑍍 । 𑌅𑌨𑍁𑌷𑍍𑌟𑍁𑌬𑍍𑌵𑍃𑌤𑍍𑌤𑌮𑍍 ।

𑌗𑍋𑌵𑌿𑌨𑍍𑌦 𑌕𑍇𑌶𑌵 𑌜𑌨𑌾𑌰𑍍𑌦𑌨 𑌵𑌾𑌸𑍁𑌦𑍇𑌵 𑌵𑌿𑌶𑍍𑌵𑍇𑌶 𑌵𑌿𑌶𑍍𑌵 𑌮𑌧𑍁𑌸𑍂𑌦𑌨 𑌵𑌿𑌶𑍍𑌵𑌰𑍂𑌪 ।
𑌶𑍍𑌰𑍀𑌪𑌦𑍍𑌮𑌨𑌾𑌭 𑌪𑍁𑌰𑍁𑌷𑍋𑌤𑍍𑌤𑌮 𑌪𑍁𑌷𑍍𑌕𑌰𑌾𑌕𑍍𑌷 𑌨𑌾𑌰𑌾𑌯𑌣𑌾𑌚𑍍𑌯𑍁𑌤 𑌨𑍃𑌸𑌿𑌂𑌹 𑌨𑌮𑍋 𑌨𑌮𑌸𑍍𑌤𑍇 ॥

𑌅𑌤𑍍𑌰 𑌨𑌰𑌸𑌿𑌂𑌹𑌂 𑌚𑌤𑍁𑌰𑍍𑌦𑌶𑌭𑌿𑌃 𑌨𑌾𑌮𑌭𑌿𑌃 𑌜𑌪𑌨𑍍 𑌰𑌾𑌮𑌃 𑌤𑌸𑍍𑌮𑍈 𑌨𑌮𑍋 𑌵𑍍𑌯𑌾𑌹𑌰𑌤𑌿 । 𑌸𑌰𑍍𑌵𑌾𑌣𑌿 𑌭𑌗𑌵𑌨𑍍𑌨𑌾𑌮𑌧𑍇𑌯𑌾𑌨𑌿 𑌸𑌮𑍍𑌬𑍁𑌦𑍍𑌧𑍌 । 𑌗𑍋𑌵𑌿𑌨𑍍𑌦 । 𑌗𑌵𑌾𑌂 𑌵𑌾𑌣𑍀𑌨𑌾𑌂 𑌸𑍍𑌤𑍁𑌤𑍀𑌨𑌾𑌂 𑌵𑌿𑌨𑍍𑌦𑌃 𑌲𑌬𑍍𑌧𑌾 𑌸𑍁𑌰𑍇𑌭𑍍𑌯 𑌇𑌤𑌿 𑌗𑍋𑌵𑌿𑌨𑍍𑌦𑌃 । 𑌯𑌦𑍍𑌵𑌾 𑌗𑌾𑌂 𑌭𑍂𑌮𑌿𑌮𑍍 𑌅𑌵𑌿𑌨𑍍𑌦𑌤𑍍 𑌪𑍍𑌰𑌾𑌪𑍍𑌨𑍋𑌦𑌿𑌤𑌿 । 𑌯𑌦𑍍𑌵𑌾 𑌗𑌾𑌵𑍋 𑌵𑍇𑌦𑌵𑌾𑌣𑍍𑌯𑍋 𑌯𑌂 𑌵𑌿𑌨𑍍𑌦𑌨𑍍𑌤𑌿 𑌲𑌭𑌨𑍍𑌤𑍇 𑌸 𑌇𑌤𑌿 । 𑌯𑌦𑍍𑌵𑌾 𑌗𑌵𑌾𑌂 𑌧𑍇𑌨𑍂𑌨𑌾𑌂 𑌵𑌿𑌨𑍍𑌦𑌃 𑌪𑌾𑌲𑌃 𑌇𑌤𑌿 𑌕𑍃𑌷𑍍𑌣𑌾𑌵𑌤𑌾𑌰𑌮𑌹𑌿𑌮𑍍𑌨𑌃 । 𑌕𑍇𑌶𑌵 । 𑌕𑍇𑌶𑌾𑌦𑍍𑌵𑍋𑌨𑍍𑌯𑌤𑌰𑌸𑍍𑌯𑌾𑌮𑍍 𑌇𑌤𑌿 𑌪𑍍𑌰𑌶𑌂𑌸𑌾𑌯𑌾𑌂 𑌵𑌃 𑌉𑌚𑍍𑌯𑌤𑍇 । 𑌶𑍋𑌭𑌨𑌾𑌃 𑌕𑍇𑌶𑌾 𑌯𑌸𑍍𑌯 𑌸 𑌇𑌤𑌿 । 𑌯𑌦𑍍𑌵𑌾 𑌵𑌾𑌨𑍍𑌤𑌿 𑌗𑌨𑍍𑌧𑌯𑌨𑍍𑌤𑌿 𑌇𑌤𑌿 𑌵𑌾𑌃 𑌕𑍇𑌶𑌾 𑌯𑌸𑍍𑌯 𑌸 𑌇𑌤𑌿 । 𑌜𑌨𑌾𑌰𑍍𑌦𑌨 । 𑌜𑌨𑌾𑌨𑍍 𑌦𑍁𑌰𑍍𑌜𑌨𑌾𑌨𑍍 𑌅𑌰𑍍𑌦𑌯𑌤𑌿 𑌹𑌿𑌨𑌸𑍍𑌤𑍀𑌤𑌿 । 𑌯𑌦𑍍𑌵𑌾 𑌜𑌨𑍈𑌃 𑌭𑌾𑌗𑌵𑌤𑍈𑌰𑌰𑍍𑌦𑍍𑌯𑌤𑍇 𑌯𑌾𑌚𑍍𑌯𑌤𑍇 𑌵𑌰𑌾𑌨𑍍 𑌇𑌤𑌿 । 𑌵𑌾𑌸𑍁𑌦𑍇𑌵 । 𑌵𑌸𑌤𑌿 𑌅𑌸𑍍𑌮𑌿𑌨𑍍 𑌸𑌰𑍍𑌵𑌮𑌿𑌤𑌿 𑌵𑌾𑌸𑍁𑌃 𑌵𑌾𑌸𑍍𑌯𑌤𑍇 𑌉𑌪𑌸𑍇𑌵𑍍𑌯𑌤𑍇 𑌭𑌕𑍍𑌤𑍈𑌰𑌿𑌤𑌿 𑌵𑌾 । 𑌦𑍀𑌵𑍍𑌯𑌤𑌿 𑌰𑌮𑌤𑍇 𑌵𑌿𑌜𑌿𑌗𑍀𑌷𑌤𑌿 𑌦𑍍𑌯𑍋𑌤𑌤𑍇 𑌸𑍍𑌤𑍂𑌯𑌤𑍇 𑌮𑍋𑌦𑌤𑍇 𑌵𑍇𑌤𑌿 𑌦𑍇𑌵𑌃 𑌦𑌿𑌵𑍁𑌁 𑌕𑍍𑌰𑍀𑌡𑌾𑌵𑌿𑌜𑌿𑌗𑍀𑌷𑌾𑌵𑍍𑌯𑌵𑌹𑌾𑌰𑌦𑍍𑌯𑍁𑌤𑌿𑌸𑍍𑌤𑍁𑌤𑌿𑌮𑍋𑌦𑌮𑌦𑌸𑍍𑌵𑌪𑍍𑌨𑌕𑌾𑌨𑍍𑌤𑌿𑌗𑌤𑌿𑌷𑍍𑌵𑌿𑌤𑌿 𑌧𑌾𑌤𑍁𑌪𑌾𑌠𑌾𑌤𑍍 । 𑌵𑌾𑌸𑍁𑌶𑍍𑌚𑌾𑌸𑍌 𑌦𑍇𑌵𑌶𑍍𑌚𑍇𑌤𑌿 𑌵𑌾𑌸𑍁𑌦𑍇𑌵𑌃 । 𑌯𑌦𑍍𑌵𑌾 𑌵𑌸𑍁𑌦𑍇𑌵𑌸𑍍𑌯𑌾𑌪𑌤𑍍𑌯𑌂 𑌪𑍁𑌮𑌾𑌨𑌿𑌤𑌿 𑌆𑌦𑌿𑌵𑍃𑌦𑍍𑌧𑍇𑌃 । 𑌵𑌿𑌶𑍍𑌵𑍇𑌶 । 𑌵𑌿𑌶𑍍𑌵𑌸𑍍𑌯 𑌬𑍍𑌰𑌹𑍍𑌮𑌾𑌣𑍍𑌡𑌸𑍍𑌯 𑌈𑌶𑌃 𑌨𑌾𑌥𑌃 𑌵𑌿𑌶𑍍𑌵𑍇𑌶𑌃 𑌲𑍋𑌕𑌨𑌾𑌥𑌃 । 𑌵𑌿𑌶𑍍𑌵 । 𑌵𑌿𑌶𑌤𑌿 𑌸𑌰𑍍𑌵𑌮𑌿𑌤𑌿 𑌵𑌿𑌶𑍍𑌵𑌮𑍍 । 𑌮𑍋𑌕𑍍𑌷𑌧𑌰𑍍𑌮𑌪𑌰𑍍𑌵𑌣𑌃 𑌵𑍇𑌷𑌨𑌾𑌦𑍍𑌵𑌿𑌶𑍍𑌵𑌮𑌿𑌤𑍍𑌯𑌾𑌹𑍁𑌰𑍍𑌲𑍋𑌕𑌾𑌨𑌾𑌮𑍍 𑌇𑌤𑌿 । 𑌮𑌧𑍁𑌸𑍂𑌦𑌨 । 𑌮𑌧𑍁𑌨𑌾𑌮𑌾𑌨𑌮𑌸𑍁𑌰𑌂 𑌸𑍂𑌦𑌤𑌿 𑌹𑌨𑍍𑌤𑍀𑌤𑌿 । 𑌵𑌿𑌶𑍍𑌵𑌰𑍂𑌪 । 𑌵𑌿𑌶𑍍𑌵𑌾𑌨𑌿 𑌸𑌰𑍍𑌵𑌾𑌣𑌿 𑌰𑍂𑌪𑌾𑌣𑌿 𑌯𑌸𑍍𑌯 𑌸𑌃 । 𑌶𑍍𑌰𑍀𑌪𑌦𑍍𑌮𑌨𑌾𑌭 । 𑌶𑍍𑌰𑌿𑌯𑌾 𑌯𑍁𑌕𑍍𑌤𑌃 𑌪𑌦𑍍𑌮𑌨𑌾𑌭𑌃 । 𑌪𑌦𑍍𑌮𑌂 𑌕𑌮𑌲𑌂 𑌸𑌕𑌲𑌲𑍋𑌕𑌕𑌾𑌰𑌣𑍀𑌭𑍂𑌤𑌂 𑌨𑌾𑌭𑍌 𑌯𑌸𑍍𑌯 𑌸𑌃 । 𑌯𑌦𑍍𑌵𑌾 𑌪𑌦𑍍𑌮𑌾𑌨𑌾𑌂 𑌲𑍋𑌕𑌾𑌨𑌾𑌂 𑌹𑍃𑌦𑌯𑌕𑌮𑌲𑌾𑌨𑌾𑌂 𑌨𑌾𑌭𑍌 𑌮𑌧𑍍𑌯𑍇 𑌭𑌵𑌃 𑌇𑌤𑌿 । 𑌯𑌦𑍍𑌵𑌾 𑌪𑌦𑍍𑌯𑌤𑍇 𑌜𑍍𑌨𑌾𑌯𑌤 𑌇𑌤𑌿 𑌪𑌦𑍍𑌮𑌂 𑌜𑍍𑌨𑌾𑌨𑌮𑍍 । 𑌪𑌦𑍍𑌮𑌸𑍍𑌯 𑌜𑍍𑌨𑌾𑌨𑌸𑍍𑌯 𑌨𑌾𑌭𑍀 𑌕𑍇𑌨𑍍𑌦𑍍𑌰𑌂 𑌪𑌦𑍍𑌮𑌨𑌾𑌭𑌃 । 𑌪𑍁𑌰𑍁𑌷𑍋𑌤𑍍𑌤𑌮 । 𑌉𑌤𑍍𑌤𑌮𑌃 𑌪𑍁𑌰𑍁𑌷𑌃 𑌪𑍁𑌰𑍁𑌷𑍋𑌤𑍍𑌤𑌮𑌃 । 𑌨 𑌨𑌿𑌰𑍍𑌧𑌾𑌰𑌣𑍇 𑌇𑌤𑌿 𑌷𑌷𑍍𑌠𑍀𑌤𑌤𑍍𑌪𑍁𑌰𑍁𑌷𑍇 𑌨𑌿𑌷𑌿𑌦𑍍𑌧𑍇 𑌕𑌰𑍍𑌮𑌧𑌾𑌰𑌯𑌃 । 𑌯𑌦𑍍𑌵𑌾 𑌪𑍁𑌰𑍁𑌷𑍇𑌭𑍍𑌯𑍋 𑌮𑌾𑌨𑌵𑍇𑌭𑍍𑌯 𑌉𑌤𑍍𑌤𑌮 𑌇𑌤𑌿 𑌪𑌞𑍍𑌚𑌮𑍀𑌤𑌤𑍍𑌪𑍁𑌰𑍁𑌷𑌃 । 𑌪𑍁𑌷𑍍𑌕𑌰𑌾𑌕𑍍𑌷 । 𑌪𑍁𑌷𑍍𑌕𑌰𑍇 𑌕𑌮𑌲𑌪𑍁𑌷𑍍𑌪𑍇 𑌇𑌵 𑌅𑌕𑍍𑌷𑌿𑌣𑍀 𑌯𑌸𑍍𑌯 𑌸𑌃 । 𑌯𑌦𑍍𑌵𑌾 𑌪𑍋𑌷𑌯𑌤𑍀 𑌭𑍂𑌤𑌾𑌨𑍀𑌤𑌿 𑌪𑍁𑌷𑍍𑌕𑌰𑍇 𑌅𑌕𑍍𑌷𑌿𑌣𑍀 𑌯𑌸𑍍𑌯 𑌸𑌃 । 𑌨𑌾𑌰𑌾𑌯𑌣 । 𑌨𑌰𑌾𑌤𑍍 𑌜𑌾𑌤𑌾𑌨𑌿 𑌤𑌤𑍍𑌤𑍍𑌵𑌾𑌨𑌿 𑌪𑌞𑍍𑌚 𑌨𑌾𑌰𑌾𑌣𑌿 । 𑌨𑌾𑌰𑌾𑌣𑍍𑌯𑌯𑌨𑌂 𑌯𑌸𑍍𑌯 𑌸𑌃 𑌅𑌨𑍍𑌤𑌰𑍍𑌯𑌾𑌮𑌿𑌤𑍍𑌵𑌾𑌨𑍍𑌨𑌾𑌰𑍇𑌷𑍁 𑌭𑌗𑌵𑌤𑍋 𑌵𑌿𑌦𑍍𑌯𑌮𑌾𑌨𑌤𑍍𑌵𑌾𑌤𑍍 । 𑌯𑌦𑍍𑌵𑌾 𑌨𑌾𑌰𑌾𑌣𑌾𑌮𑍍 𑌅𑌯𑌨𑌂 𑌪𑍍𑌰𑌲𑌯𑌕𑌾𑌲 𑌇𑌤𑌿 । 𑌅𑌚𑍍𑌯𑍁𑌤 । 𑌨 𑌚𑍍𑌯𑍁𑌤𑌃 𑌇𑌤𑌿 । 𑌸𑍍𑌵𑌰𑍂𑌪𑌸𑌾𑌮𑌰𑍍𑌥𑍍𑌯𑌾𑌨𑍍𑌨 𑌚𑍍𑌯𑍁𑌤𑌃 । 𑌯𑌦𑍍𑌵𑌾 𑌪𑍍𑌰𑌪𑌨𑍍𑌨𑍇𑌭𑍍𑌯𑍋 𑌅𑌨𑌪𑌗𑌤𑌵𑌾𑌤𑍍 𑌅𑌚𑍍𑌯𑍁𑌤𑌃 । 𑌯𑌦𑍍𑌵𑌾 𑌜𑌨𑌨𑌬𑌾𑌲𑍍𑌯𑌕𑍌𑌮𑌾𑌰𑌜𑌰𑌾𑌦𑍍𑌯𑌵𑌸𑍍𑌥𑌾𑌯𑌾𑌨𑌾𑌮𑍍 𑌅𑌵𑌸𑍍𑌥𑌾𑌨𑍍𑌤𑌰𑌂 𑌨 𑌚𑍍𑌯𑌵𑌤𑍀𑌤𑌿 । 𑌨𑍃𑌸𑌿𑌮𑍍𑌹 । 𑌨𑌾 𑌚𑌾𑌸𑍌 𑌸𑌿𑌂𑌹𑌶𑍍𑌚𑍇𑌤𑌿 𑌨𑍃𑌸𑌿𑌂𑌹𑍍𑌵𑌾𑌤𑌰𑌾𑌰𑍂𑌪𑌃 । 𑌨𑌮𑌃 𑌨𑌮𑌸𑍍𑌕𑌰𑍋𑌮𑌿 । 𑌤𑍇 𑌤𑍁𑌭𑍍𑌯𑌂 𑌨𑌮𑌃𑌸𑍍𑌵𑌾𑌹𑌾𑌸𑍍𑌵𑌧𑌾𑌲𑌮𑍍𑌵𑌷𑌡𑍍𑌯𑍋𑌗𑌾𑌚𑍍𑌚 𑌇𑌤𑍍𑌯𑌨𑍇𑌨 𑌚𑌤𑍁𑌰𑍍𑌥𑍀 । 𑌉𑌕𑍍𑌤𑌾 𑌵𑌸𑌨𑍍𑌤𑌤𑌿𑌲𑌕𑌾 𑌤𑌭𑌜𑌾 𑌜𑌗𑍌 𑌗𑌃 𑌇𑌤𑌿 𑌵𑌸𑌨𑍍𑌤𑌤𑌿𑌲𑌕𑌾𑌵𑍃𑌤𑍍𑌤𑌮𑍍 ।

𑌦𑍇𑌵𑌾𑌃 𑌸𑌮𑌸𑍍𑌤𑌾𑌃 𑌖𑌲𑍁 𑌯𑍋𑌗𑌿𑌮𑍁𑌖𑍍𑌯𑌾𑌃 𑌗𑌨𑍍𑌧𑌰𑍍𑌵𑌵𑌿𑌦𑍍𑌯𑌾𑌧𑌰𑌕𑌿𑌨𑍍𑌨𑌰𑌾𑌶𑍍𑌚 ।
𑌯𑌤𑍍𑌪𑌾𑌦𑌮𑍂𑌲𑌂 𑌸𑌤𑌤𑌂 𑌨𑌮𑌨𑍍𑌤𑌿 𑌤𑌂 𑌨𑌾𑌰𑌸𑌿𑌂𑌹𑌂 𑌶𑌰𑌣𑌮𑍍 𑌗𑌤𑍋𑌸𑍍𑌮𑌿 ॥

𑌸𑌮𑌸𑍍𑌤𑌾𑌃 𑌸𑌰𑍍𑌵𑍇 𑌦𑍇𑌵𑌾𑌃 𑌸𑍁𑌰𑌾𑌃 𑌖𑌲𑍁 𑌨𑍂𑌨𑌮𑍍 । 𑌯𑍋𑌗𑌿𑌮𑍁𑌖𑍍𑌯𑌾𑌃 𑌮𑍁𑌖𑍍𑌯𑌾𑌃 𑌪𑍍𑌰𑌮𑍁𑌖𑌾𑌃 𑌯𑍋𑌗𑌿𑌨𑌃 । 𑌗𑌨𑍍𑌧𑌰𑍍𑌵𑌾𑌶𑍍𑌚 𑌵𑌿𑌦𑍍𑌯𑌾𑌧𑌰𑌾𑌶𑍍𑌚 𑌕𑌿𑌨𑍍𑌨𑌰𑌾𑌶𑍍𑌚𑌾 𑌗𑌨𑍍𑌧𑌰𑍍𑌵𑌵𑌿𑌦𑍍𑌯𑌾𑌧𑌰𑌕𑌿𑌨𑍍𑌨𑌰𑌾𑌶𑍍𑌚 𑌭𑌿𑌨𑍍𑌨𑌪𑍍𑌰𑌕𑌾𑌰𑌾 𑌦𑍇𑌵𑌯𑍋𑌨𑌯𑌃 । 𑌯𑌤𑍍𑌪𑌾𑌦𑌮𑍂𑌲𑌂 𑌯𑌸𑍍𑌯 𑌪𑌾𑌦𑌯𑍋𑌃 𑌅𑌙𑍍𑌘𑍍𑌰𑍍𑌯𑍋𑌰𑍍𑌮𑍂𑌲𑌮𑍍 𑌅𑌧𑍋𑌭𑌾𑌗𑌮𑍍 । 𑌸𑌤𑌤𑌂 𑌸𑌦𑌾 𑌪𑍁𑌨𑌃 𑌪𑍁𑌨𑌰𑍍𑌵𑌾 𑌨𑌮𑌨𑍍𑌤𑌿 𑌨𑌮𑌸𑍍𑌕𑍁𑌰𑍍𑌵𑌨𑍍𑌤𑌿 𑌤𑌂 𑌤𑌥𑌾𑌭𑍂𑌤𑌮𑍍 । 𑌨𑌾𑌰𑌸𑌿𑌂𑌹𑌂 𑌨𑌰𑌸𑌿𑌂𑌹 𑌏𑌵 𑌨𑌾𑌰𑌸𑌿𑌂𑌹𑌃 𑌸𑍍𑌵𑌾𑌰𑍍𑌥𑍇𑌣𑍍 । 𑌯𑌦𑍍𑌵𑌾 𑌨𑌰𑌸𑍍𑌯 𑌅𑌵𑌯𑌵𑌾𑌨𑌿 𑌨𑌾𑌰𑌾𑌣𑌿 𑌨𑌾𑌰𑍈𑌃 𑌸𑌹𑌿𑌤𑌃 𑌸𑌿𑌂𑌹𑌃 𑌨𑌾𑌰𑌸𑌿𑌂𑌹𑌃 । 𑌤𑌮𑍍 । 𑌶𑌰𑌣𑌂 𑌗𑌤𑌃 𑌪𑍍𑌰𑌪𑌨𑍍𑌨𑌃 𑌅𑌸𑍍𑌮𑌿 । 𑌶𑍍𑌰𑍀𑌰𑌾𑌮𑌸𑍍𑌯 𑌪𑍁𑌂𑌸𑍍𑌤𑍍𑌵𑌾𑌤𑍍 𑌗𑌤𑌃 । 𑌸𑍍𑌤𑍋𑌤𑍍𑌰𑌮𑌿𑌦𑌂 𑌪𑌿𑌪𑌠𑌿𑌷𑍁𑌰𑍍𑌯𑍋𑌷𑌿𑌤𑍍 𑌗𑌤𑌾𑌸𑍍𑌮𑍀𑌤𑌿 𑌵𑌚𑍍𑌯𑌾𑌤𑍍 । 𑌸𑍍𑌯𑌾𑌦𑌿𑌨𑍍𑌦𑍍𑌰𑌵𑌜𑍍𑌰𑌾 𑌤𑌤𑌜𑌾𑌸𑍍𑌤𑌤𑍋 𑌗𑍌 𑌇𑌤𑍀𑌨𑍍𑌦𑍍𑌰𑌵𑌜𑍍𑌰𑌾𑌵𑍃𑌤𑍍𑌤𑌮𑍍 ।

𑌵𑍇𑌦𑌾𑌨𑍍 𑌸𑌮𑌸𑍍𑌤𑌾𑌨𑍍 𑌖𑌲𑍁 𑌶𑌾𑌸𑍍𑌤𑍍𑌰𑌗𑌰𑍍𑌭𑌾𑌨𑍍 𑌵𑌿𑌦𑍍𑌯𑌾𑌬𑌲𑍇 𑌕𑍀𑌰𑍍𑌤𑌿𑌮𑌤𑍀𑌂 𑌚 𑌲𑌕𑍍𑌷𑍍𑌮𑍀𑌮𑍍 ।
𑌯𑌸𑍍𑌯 𑌪𑍍𑌰𑌸𑌾𑌦𑌾𑌤𑍍 𑌸𑌤𑌤𑌂 𑌲𑌭𑌨𑍍𑌤𑍇 𑌤𑌂 𑌨𑌾𑌰𑌸𑌿𑌂𑌹𑌂 𑌶𑌰𑌣𑌮𑍍 𑌗𑌤𑍋𑌸𑍍𑌮𑌿 ॥

𑌵𑍇𑌦𑌾𑌨𑍍 𑌸𑌮𑌸𑍍𑌤𑌾𑌨𑍍 𑌸𑌰𑍍𑌵𑌾𑌨𑍍 𑌋𑌗𑍍𑌯𑌜𑍁𑌸𑍍𑌸𑌾𑌮𑌾𑌨𑌿 𑌖𑌲𑍁 𑌨𑌨𑍁 𑌶𑌾𑌸𑍍𑌤𑍍𑌰𑌗𑌰𑍍𑌭𑌾𑌨𑍍 𑌶𑌾𑌸𑍍𑌤𑍍𑌰𑌾𑌨𑍍𑌤𑌰𑍍𑌗𑌤𑌾𑌨𑍍 । 𑌵𑌿𑌦𑍍𑌯𑌾𑌬𑌲𑍇 𑌵𑌿𑌦𑍍𑌯𑌾 𑌜𑍍𑌨𑌾𑌨𑌂 𑌬𑌲𑌂 𑌶𑌸𑍍𑌤𑍍𑌰𑌾𑌣𑌿 𑌚 । 𑌕𑍀𑌰𑍍𑌤𑌿𑌮𑌤𑍀𑌂 𑌲𑌕𑍍𑌷𑍍𑌮𑍀𑌂 𑌯𑌶𑌸𑌾 𑌯𑍁𑌕𑍍𑌤𑌂 𑌮𑌾𑌙𑍍𑌗𑌲𑍍𑌯𑌮𑍍 । 𑌸𑌤𑌤𑌂 𑌸𑌦𑌾 𑌭𑍂𑌰𑌿 𑌵𑌾 𑌲𑌭𑌨𑍍𑌤𑍇 । 𑌜𑌨𑌾 𑌇𑌤𑌿 𑌶𑍇𑌷𑌃 । 𑌯𑌸𑍍𑌯 𑌨𑍃𑌸𑌿𑌂𑌹𑌸𑍍𑌯 𑌪𑍍𑌰𑌸𑌾𑌦𑌾𑌤𑍍 𑌅𑌨𑍁𑌗𑍍𑌰𑌹𑌾𑌤𑍍 । 𑌤𑌂 𑌤𑌥𑌾𑌭𑍂𑌤𑌂 𑌨𑌾𑌰𑌸𑌿𑌂𑌹𑌂 𑌶𑌰𑌣𑌂 𑌗𑌤𑍋𑌸𑍍𑌮𑌿 । 𑌯𑌥𑌾𑌪𑍂𑌰𑍍𑌵𑌮𑍍 𑌇𑌨𑍍𑌦𑍍𑌰𑌵𑌜𑍍𑌰𑌾 ।

𑌬𑍍𑌰𑌹𑍍𑌮𑌾 𑌶𑌿𑌵𑌸𑍍𑌤𑍍𑌵𑌂 𑌪𑍁𑌰𑍁𑌷𑍋𑌤𑍍𑌤𑌮𑌶𑍍𑌚 𑌨𑌾𑌰𑌾𑌯𑌣𑍋𑌸𑍌 𑌮𑌰𑍁𑌤𑌾𑌂 𑌪𑌤𑌿𑌶𑍍𑌚 ।
𑌚𑌨𑍍𑌦𑍍𑌰𑌾𑌰𑍍𑌕𑌵𑌾𑌯𑍍𑌵𑌗𑍍𑌨𑌿𑌮𑌰𑍁𑌦𑍍𑌗𑌣𑌾𑌶𑍍𑌚 𑌤𑍍𑌵𑌮𑍇𑌵 𑌤𑌂 𑌤𑍍𑌵𑌾𑌂 𑌸𑌤𑌤𑌂 𑌨𑌤𑍋𑌸𑍍𑌮𑌿 ॥

𑌬𑍍𑌰𑌹𑍍𑌮𑌾 𑌵𑌿𑌰𑌿𑌞𑍍𑌚𑌿𑌃 𑌶𑌿𑌵𑍋 𑌮𑌹𑍇𑌶𑌃 𑌪𑍁𑌰𑍁𑌷𑍋𑌤𑍍𑌤𑌮𑌃 𑌮𑌹𑌾𑌵𑌿𑌷𑍍𑌣𑍁𑌃 । 𑌨𑌾𑌰𑌾𑌯𑌣𑌃 𑌪𑌰𑌮𑌾𑌤𑍍𑌮𑌸𑍍𑌵𑌰𑍂𑌪𑌃 । 𑌅𑌸𑍌 𑌵𑌿𑌪𑍍𑌰𑌕𑍃𑌷𑍍𑌟𑌃 𑌪𑌰𑌤𑍍𑌵𑌾𑌤𑍍 । 𑌮𑌰𑍁𑌤𑌾𑌂 𑌪𑌤𑌿𑌃 𑌮𑌰𑍁𑌤𑍍𑌵𑌾𑌨𑍍 𑌇𑌨𑍍𑌦𑍍𑌰𑌃 । 𑌚𑌨𑍍𑌦𑍍𑌰𑌾𑌰𑍍𑌕𑌵𑌾𑌯𑍍𑌵𑌗𑍍𑌨𑌿𑌮𑌰𑍁𑌦𑍍𑌗𑌣𑌾𑌶𑍍𑌚 𑌚𑌨𑍍𑌦𑍍𑌰𑍋 𑌵𑌿𑌧𑍁𑌃 𑌅𑌰𑍍𑌕𑌃 𑌸𑍂𑌰𑍍𑌯𑌃 𑌵𑌾𑌯𑍁𑌃 𑌸𑌮𑍀𑌰𑌣𑌃 𑌅𑌗𑍍𑌨𑌿𑌰𑌨𑌲𑌃 𑌮𑌰𑍁𑌦𑍍𑌗𑌣𑌾 𑌮𑌰𑍁𑌦𑍍𑌦𑍇𑌵𑌤𑌾𑌶𑍍𑌚 । 𑌸𑌰𑍍𑌵𑌾 𑌅𑌪𑌿 𑌇𑌮𑌾 𑌦𑍇𑌵𑌤𑌾𑌃 𑌤𑍍𑌵𑌮𑍇𑌵 । 𑌤𑌂 𑌤𑌾𑌦𑍃𑌶𑌂 𑌤𑍍𑌵𑌾𑌂 𑌭𑌵𑌨𑍍𑌤𑌂 𑌸𑌤𑌤𑌂 𑌸𑌨𑍍𑌤𑌤𑌂 𑌨𑌤𑍋𑌸𑍍𑌮𑌿 𑌨𑌮𑌾𑌮𑌿 । 𑌣𑌮𑌁𑌧𑌾𑌤𑍋𑌃 𑌗𑌤𑍍𑌯𑌰𑍍𑌥𑌕𑌤𑍍𑌵𑌾𑌤𑍍 𑌕𑌰𑍍𑌤𑌰𑌿 𑌕𑍍𑌤𑌃 । 𑌯𑌥𑌾𑌪𑍂𑌰𑍍𑌵𑌂 𑌯𑍋𑌷𑌿𑌦𑍍𑌭𑌿𑌰𑍍𑌨𑌤𑌾𑌸𑍍𑌮𑍀𑌤𑌿 𑌵𑌾𑌚𑍍𑌯𑌮𑍍 । 𑌸𑍍𑌯𑌾𑌦𑌿𑌨𑍍𑌦𑍍𑌰𑌵𑌜𑍍𑌰𑌾 𑌤𑌤𑌜𑌾𑌸𑍍𑌤𑌤𑍋 𑌗𑌾𑌵𑍁𑌪𑍇𑌨𑍍𑌦𑍍𑌰𑌵𑌜𑍍𑌰𑌾 𑌜𑌤𑌜𑌾𑌸𑍍𑌤𑌤𑍋 𑌗𑍌 । 𑌅𑌨𑌨𑍍𑌤𑌰𑍋𑌦𑍀𑌰𑌿𑌤𑌲𑌕𑍍𑌷𑍍𑌮𑌭𑌾𑌜𑌃 𑌪𑌾𑌦𑌾 𑌯𑌦𑍀𑌯𑌾 𑌉𑌪𑌜𑌾𑌤𑌯𑌸𑍍𑌤𑌾𑌃 ॥ 𑌇𑌤𑍍𑌯𑍁𑌪𑌜𑌾𑌤𑌿𑌵𑍃𑌤𑍍𑌤𑌮𑍍 ।

𑌸𑍍𑌵𑌪𑍍𑌨𑍇𑌪𑌿 𑌨𑌿𑌤𑍍𑌯𑌂 𑌜𑌗𑌤𑌾𑌮𑍍 𑌤𑍍𑌰𑌯𑌾𑌣𑌾𑌂 𑌸𑍍𑌰𑌷𑍍𑌟𑌾 𑌚 𑌹𑌨𑍍𑌤𑌾 𑌚 𑌵𑌿𑌭𑍁𑌰𑌪𑍍𑌰𑌮𑍇𑌯𑌃 ।
𑌤𑍍𑌰𑌾𑌤𑌾 𑌤𑍍𑌵𑌮𑍇𑌕𑌸𑍍𑌤𑍍𑌰𑌿𑌵𑌿𑌧𑍋 𑌵𑌿𑌭𑌿𑌨𑍍𑌨𑌃 𑌤𑌂 𑌤𑍍𑌵𑌾𑌂 𑌨𑍃𑌸𑌿𑌂𑌹𑌂 𑌸𑌤𑌤𑌂 𑌨𑌤𑍋𑌸𑍍𑌮𑌿 ॥

𑌸𑍍𑌵𑌪𑍍𑌨𑍇𑌪𑌿 𑌸𑌂𑌵𑍇𑌶𑍇 𑌅𑌪𑌿 𑌨𑌿𑌤𑍍𑌯𑌂 𑌸𑌰𑍍𑌵𑌦𑌾 𑌜𑌗𑌤𑌾𑌂 𑌲𑍋𑌕𑌾𑌨𑌾𑌂 𑌤𑍍𑌰𑌯𑌾𑌣𑌾𑌂 𑌤𑍍𑌰𑌯𑌸𑍍𑌯 𑌸𑍍𑌰𑌷𑍍𑌟𑌾 𑌨𑌿𑌰𑍍𑌮𑌾𑌤𑌾 𑌹𑌨𑍍𑌤𑌾 𑌨𑌾𑌶𑌯𑌿𑌤𑌾 । 𑌵𑌿𑌭𑍁𑌃 𑌵𑌿𑌵𑌿𑌧𑌂 𑌭𑌵𑌤𑌿 𑌵𑌿𑌭𑌵𑌾𑌵𑌤𑌾𑌰𑍈𑌃 𑌸𑌰𑍍𑌵𑌵𑍍𑌯𑌾𑌪𑌿𑌤𑍍𑌵𑌾𑌦𑍍𑌵𑌾 । 𑌅𑌪𑍍𑌰𑌮𑍇𑌯𑌃 𑌪𑍍𑌰𑌮𑌾𑌤𑍁𑌮𑌶𑌕𑍍𑌯𑌃 । 𑌤𑍍𑌰𑌾𑌤𑌾 𑌰𑌕𑍍𑌷𑌿𑌤𑌾 । 𑌤𑍍𑌵𑌮𑍍 𑌏𑌕𑌃 𑌕𑍇𑌵𑌲𑌃 𑌤𑍍𑌰𑌿𑌵𑌿𑌧𑌃 𑌸𑍃𑌷𑍍𑌟𑌿𑌸𑍍𑌥𑌿𑌤𑌿𑌸𑌂𑌹𑌾𑌰𑌕𑌰𑍍𑌤𑌾𑌰𑌃 । 𑌵𑌿𑌭𑌿𑌨𑍍𑌨𑌃 𑌬𑍍𑌰𑌹𑍍𑌮𑌵𑌿𑌷𑍍𑌣𑍁𑌰𑍁𑌦𑍍𑌰𑌾𑌦𑌿𑌰𑍂𑌪𑌃 । 𑌏𑌕𑌂 𑌸𑌦𑍍𑌵𑌿𑌪𑍍𑌰𑌾 𑌬𑌹𑍁𑌧𑌾 𑌵𑌦𑌨𑍍𑌤𑍀𑌤𑌿 𑌋𑌗𑍍𑌵𑍇𑌦𑍇 । 𑌸𑌮𑌸𑍍𑌤𑌦𑍇𑌵𑌤𑌾𑌨𑍍𑌤𑌰𑍍𑌯𑌾𑌮𑌿𑌤𑍍𑌵𑌾𑌦𑍍𑌵𑌾 । 𑌮𑌯𑌾 𑌤𑌤𑌮𑌿𑌦𑌂 𑌸𑌰𑍍𑌵𑌂 𑌜𑌗𑌦𑌵𑍍𑌯𑌕𑍍𑌤𑌮𑍂𑌰𑍍𑌤𑌿𑌨𑍇𑌤𑌿 𑌗𑍀𑌤𑌾𑌚𑌾𑌰𑍍𑌯𑍋𑌕𑍍𑌤𑌿𑌃 । 𑌤𑌂 𑌤𑌥𑌾𑌭𑍂𑌤𑌂 𑌤𑍍𑌵𑌾𑌂 𑌨𑍃𑌸𑌿𑌂𑌹𑌂 𑌸𑌤𑌤𑌂 𑌸𑌦𑌾 𑌨𑌤𑍋𑌸𑍍𑌮𑌿 𑌪𑍂𑌜𑌯𑌾𑌮𑌿 । 𑌪𑍁𑌨𑌶𑍍𑌚 𑌇𑌨𑍍𑌦𑍍𑌰𑌵𑌜𑍍𑌰𑌾𑌨𑌾𑌮𑍍𑌨𑍀 𑌉𑌪𑌜𑌾𑌤𑌿𑌃 ।

𑌇𑌤𑌿 𑌸𑍍𑌤𑍁𑌤𑍍𑌵𑌾 𑌰𑌘𑍁𑌶𑍍𑌰𑍇𑌷𑍍𑌠𑌃 𑌪𑍂𑌜𑌯𑌾𑌮𑌾𑌸 𑌤𑌂 𑌹𑌰𑌿𑌮𑍍 ।
𑌪𑍁𑌷𑍍𑌪𑌵𑍃𑌷𑍍𑌟𑌿𑌃 𑌪𑌪𑌾𑌤𑌾𑌶𑍁 𑌤𑌸𑍍𑌯 𑌦𑍇𑌵𑌸𑍍𑌯 𑌮𑍂𑌰𑍍𑌧𑌨𑌿 ।
𑌸𑌾𑌧𑍁 𑌸𑌾𑌧𑍍𑌵𑌿𑌤𑌿 𑌤𑌂 𑌪𑍍𑌰𑍋𑌚𑍁𑌰𑍍𑌦𑍇𑌵𑌾 𑌋𑌷𑌿𑌗𑌣𑍈𑌃 𑌸𑌹 ॥

𑌇𑌤𑌿 𑌸𑍍𑌤𑍁𑌤𑍍𑌵𑌾 𑌨𑍁𑌤𑍍𑌵𑌾 𑌰𑌘𑍁𑌶𑍍𑌰𑍇𑌷𑍍𑌠𑌃 𑌰𑌘𑍁𑌕𑍁𑌲𑌪𑍁𑌙𑍍𑌗𑌵𑌃 𑌪𑍂𑌜𑌯𑌾𑌮𑌾𑌸 𑌆𑌨𑌰𑍍𑌚 𑌤𑌂 𑌹𑌰𑌿𑌂 𑌨𑌰𑌹𑌰𑌿𑌮𑍍 । 𑌪𑍁𑌷𑍍𑌪𑌵𑍃𑌷𑍍𑌟𑌿𑌃 𑌕𑍁𑌸𑍁𑌮𑌧𑌾𑌰𑌾 𑌪𑌪𑌾𑌤 𑌸𑌮𑌪𑌤𑌤𑍍 𑌤𑌸𑍍𑌯 𑌦𑍇𑌵𑌸𑍍𑌯 𑌰𑌾𑌮𑌸𑍍𑌯 𑌮𑍂𑌰𑍍𑌧𑌨𑌿 𑌶𑌿𑌰𑌸𑌿 । 𑌸𑌾𑌧𑍁 𑌸𑌾𑌧𑍍𑌵𑌿𑌤𑌿 𑌪𑍍𑌰𑌶𑌮𑍍𑌸𑌾𑌵𑌾𑌚𑌕𑌾𑌨𑍍 𑌶𑌬𑍍𑌦𑌾𑌨𑍍 𑌤𑌂 𑌶𑍍𑌰𑍀𑌰𑌾𑌮𑌚𑌨𑍍𑌦𑍍𑌰𑌂 𑌪𑍍𑌰𑍋𑌚𑍁𑌰𑍍𑌜𑍁𑌘𑍁𑌷𑍁𑌃 𑌦𑍇𑌵𑌾 𑌅𑌮𑌰𑍍𑌤𑍍𑌯𑌾 𑌋𑌷𑌿𑌗𑌣𑍈𑌃 𑌮𑍁𑌨𑌿𑌸𑌮𑍂𑌹𑍈𑌃 𑌸𑌹 𑌸𑌹𑌿𑌤𑌾𑌃 । 𑌅𑌨𑍁𑌷𑍍𑌟𑍁𑌪𑍍 ।

𑌰𑌾𑌘𑌵𑍇𑌣 𑌕𑍃𑌤𑌂 𑌸𑍍𑌤𑍋𑌤𑍍𑌰𑌂 𑌪𑌞𑍍𑌚𑌾𑌮𑍃𑌤𑌮𑌨𑍁𑌤𑍍𑌤𑌮𑌮𑍍 ।
𑌪𑌠𑌨𑍍𑌤𑌿 𑌯𑍇 𑌦𑍍𑌵𑌿𑌜𑌵𑌰𑌾𑌸𑍍𑌤𑍇𑌷𑌾𑌂 𑌸𑍍𑌵𑌰𑍍𑌗𑌸𑍍𑌤𑍁 𑌶𑌾𑌶𑍍𑌵𑌤𑌃 ॥

𑌰𑌾𑌘𑌵𑍇𑌣 𑌰𑌘𑍁𑌕𑍁𑌲𑍋𑌤𑍍𑌪𑌨𑍍𑌨𑍇𑌨 𑌕𑍃𑌤𑌂 𑌵𑌿𑌰𑌚𑌿𑌤𑌂 𑌸𑍍𑌤𑍋𑌤𑍍𑌰𑌂 𑌸𑍍𑌤𑌵𑌃 𑌪𑌞𑍍𑌚𑌾𑌮𑍃𑌤𑌂 𑌪𑌞𑍍𑌚𑌭𑌿𑌃 𑌅𑌮𑍃𑌤𑌤𑍁𑌲𑍍𑌯𑍈𑌃 𑌶𑍍𑌲𑍋𑌕𑍈𑌃 𑌵𑌿𑌹𑌿𑌤𑌂 𑌅𑌨𑍁𑌤𑍍𑌤𑌮𑌂 𑌅𑌵𑌿𑌦𑍍𑌯𑌮𑌾𑌨𑌮𑍍 𑌉𑌤𑍍𑌤𑌮𑌂 𑌶𑍍𑌰𑍇𑌷𑍍𑌠𑌤𑌰𑌮𑍍 𑌇𑌤𑌰𑌸𑍍𑌤𑍋𑌤𑍍𑌰𑌂 𑌯𑌸𑍍𑌮𑌾𑌤𑍍 𑌤𑌤𑍍 𑌦𑍍𑌵𑌿𑌤𑍀𑌯𑌾𑌯𑌾𑌮𑍍 । 𑌪𑌠𑌨𑍍𑌤𑌿 𑌵𑌦𑌨𑍍𑌤𑌿 𑌯𑍇 𑌦𑍍𑌵𑌿𑌜𑌵𑌰𑌾𑌃 𑌅𑌗𑍍𑌰𑌜𑌨𑍍𑌮𑌾𑌨𑌃 𑌤𑍇𑌷𑌾𑌂 𑌸𑍍𑌵𑌰𑍍𑌗𑌃 𑌉𑌤𑍍𑌤𑌮𑌪𑌦𑌵𑍀 𑌶𑌾𑌶𑍍𑌵𑌤𑌃 𑌨𑌿𑌤𑍍𑌯𑌃 𑌭𑌵𑍇𑌦𑌿𑌤𑌿 । 𑌤𑍁 𑌨𑌿𑌶𑍍𑌚𑌯𑌾𑌰𑍍𑌥𑍇 । 𑌅𑌨𑍁𑌷𑍍𑌤𑍁𑌬𑍍𑌵𑍃𑌤𑍍𑌤𑌮𑍍 ।

॥ 𑌶𑌮𑍍 ॥